ဦးဂျင်မီ ဦးဖြိုးဇေယျာသော်တို့ကို ပြစ်ဒဏ်စီရင်ပြီးကြောင်း စစ်ကောင်စီထုတ်ပြန်

သေဒဏ်ချမှတ်ခံထားရသော ဦးဂျင်မီ၊ ဦးဖြိုးဇေယျာသော်တို့အပါအဝင် နိုင်ငံရေးအကျဉ်းသားလေးဦးကို ပြစ်ဒဏ်စီရင်ဆောင်ရွက်ပြီးဖြစ်ကြောင်း ယနေ့ (ဇူလိုင်လ ၂၅ ရက်) ထုတ် စစ်ကောင်စီထုတ်သတင်းစာများတွင် ဖော်ပြထားသည်။

ဦးကျော်မင်းယု (ခ) ဦးဂျင်မီ၊ ဦးဖြိုးဇေယျာသော်(ခ) မောင်ကျော် (ခ)ရေခဲ ၊ ဦးလှမျိုးအောင် (ခ) ကိုမျိုးနဲ့ အောင်သူရဇော် (ခ) ကိုသူရတို့လေးဦးကို ” အကျဉ်းထောင်လုပ်ထုံးလုပ်နည်းများအတိုင်း ပြစ်ဒဏ်စီရင် ဆောင်ရွက်ပြီးဖြစ်ကြောင်း” မြန်မာ့အလင်း၊ ကြေးမုံတို့အပြင် အင်္ဂလိပ်ဘာသာဖြင့်ထုတ်ဝေသော Global New Light of Myanmar သတင်းစာတို့တွင် ပါရှိသည်။

(ဝဲမှယာ) သေဒဏ်စီရင်ပြီးစီးကြောင်း ဇူလိုင်လ ၂၅ရက်နေ့ သတင်းထုတ်ပြန်ခဲ့သော ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်၊ ကိုအောင်သူရဇော်

 

ဇူလိုင်လ ၂၂ ရက်က အဆိုပါလေးယောက်လုံးကို မိသားစုဝင်များနှင့် ပထမဆုံးအကြိမ် အွန်လိုင်း ဗီဒီယိုကတဆင့်တွေ့ခွင့်ပေးခဲ့ပြီးနောက် ပြစ်ဒဏ်စီရင်ပြီးကြောင်း ထုတ်ပြန်လာခြင်းဖြစ်သည်။

ရန်ကုန်မြို့ အင်းစိန်ထောင်တွင် ဇူလိုင် ၂၂ ရက်နေ့ကတည်းက ထောင်ဝန်ထမ်းများကို တင်းကြပ်မှုများပြုလုပ်ထားပြီး ပြင်ပနှင့်အဆက်သွယ်လုပ်မှုပြတ်တောက်အောင် ထိန်းချုပ်ထားခဲ့သည်ဟု ဖမ်းဆီးခံရသော နိုင်ငံရေးအကျဉ်းသားများအတွက် အမှုလိုက်ရှေ့နေတစ်ဦးက မဇ္ဈိမသို့ပြောသည်။

” “မိသားစုနဲ့ တွေ့ခွင့်ပေးမယ်ဆိုကတည်းက တစ်ခုခုတော့ ထူးခြားတယ်လို့ ကျွန်တော်ထင်တယ်။ မနေ့က ကြိုးပေးတယ်လို့တော့ သိရတယ် ၊ ကျိန်းသေတာက သောကြာနေ့ကစပြီး ထောင်ထဲမှာ ဝန်ထမ်းတွေကို တင်းကြပ်ထားတယ်။အထဲနဲ့ကို လုံးဝအဆက်အသွယ်မရတာ ၊ သူတို့ တကယ် ဒီလိုလုပ်လိုက်တယ်ဆိုရင် အားလုံးကို စိန်ခေါ်လိုက်တာပဲ” ဟု အမည်မဖော်လိုသော ရှေ့နေက ပြောသည်။

 

62  Views
Previous: အာဆီယံအလှည့်ကျဥက္ကဋ္ဌက ဒီမိုကရေစီရေးတက်ကြွလှုပ်ရှားသူ ၄ ဦးကို ကွပ်မျက်ခဲ့တာအပေါ် မြန်မာစစ်ကောင်စီကို ဝေဖန်
Next: ရန်ကုန်ကက်သလစ်ဂိုဏ်းချုပ်သာသနာက ဆယ်ဖို့တစ်ဖို့၏သာသနာပြုလုပ်ငန်း