ကုလအတွင်းရေးမှူးချုပ်ကို နောက်ထပ် ၅ နှစ် တာဝန်ပေးအပ်
ကုလသမဂ္ဂ အတွင်းရေးမှူးချုပ် Antonio Guterres ကို နောက်ထပ် ၅ နှစ် သက်တမ်း တာဝန်ယူဖို့ အထွေထွေညီလာခံက အတည်ပြုလိုက်ပါတယ်။ အတွင်းရေးမှူးချုပ်ကတော့ သမိုင်းတလျှောက် အရေးကြီးတဲ့ ကာလမျိုးမှာ ကြီးမားတဲ့ တာဝန်တွေကို အပ်နှင်းခံရတဲ့အတွက် ဂုဏ်ယူကြောင်း ပြောကြားခဲ့တာပါ။
“နောက်ဆက်တွဲ အကျိုးဆက်တွေ ကြုံရမယ့် ရွေးချယ်မှုတွေနဲ့အတူ ကျနော်တို့ဟာ လမ်းဆုံလမ်းခွမှာ ရောက်နေကြတာပါ။ အကျပ်အတည်း သံသရာထဲမှာပဲ တဝဲလည်လည် ဖြစ်နေမယ့် ပြိုလဲပျက်စီးတဲ့ လမ်းကြောင်းကို ဦးတည်နိုင်သလို၊ အားလုံးအတွက် ပိုမိုသန့်ရှင်းပြီး ဘေးကင်းလုံခြုံတဲ့ သာယာတဲ့ အနာဂတ်ကို ဦးတည်မယ့် အပြောင်းအလဲတွေလည်း ဖြစ်လာနိုင်ပါတယ်။ ကျနော့်အနေနဲ့ကတော့ အပြောင်းအလဲတွေ ဖြစ်လာအောင် အစွန်းကုန် တွန်းအားပေးသွားမှာ ဖြစ်ပါတယ်။” လို့ အတွင်းရေးမှူးချုပ် Guterres က နယူးယောက် ကုလသမဂ္ဂ ရုံးချုပ်မှာ သောကြာနေ့က နောက်တကြိမ် တာဝန်သက်တမ်း လက်ခံရယူတဲ့ မိန့်ခွန်းမှာ ထည့်သွင်း ပြောဆိုသွားတာပါ။
ကုလသမဂ္ဂ အဖွဲ့ဝင် နိုင်ငံတွေ အားလုံးအပေါ် ညီတူညီမျှ ဆက်ဆံသွားမှာဖြစ်သလို၊ နိုင်ငံတွေကြား ယုံကြည်မှုတွေကို မြေတောင်မြှောက်ပေးဖို့လည်း ကတိပြုခဲ့သလို၊ မဖြစ်နိုင်ဘူးလို့ ယူဆထားတဲ့ ကိစ္စတွေ ဖြစ်လာအောင် ဦးဆောင် ကြိုးပမ်းမှာ ဖြစ်ကြောင်းလည်း ပြောဆိုခဲ့ပါတယ်။
အတွင်းရေးမှူးချုပ်ကို နောက်ထပ် တာဝန်ပေးဖို့ ကုလသမဂ္ဂမှာ သြဇာအရှိန်အဝါ ကြီးမားတဲ့ လုံခြုံရေးကောင်စီက ဇွန်လ ၈ ရက်နေ့ကပဲ ထောက်ခံမှုပေးထားတာပါ။ အတွင်းရေးမှူးချုပ်ကို ဆက်လက် တာဝန်ပေးဖို့ တညီတညွတ်တည်း ထောက်ခံခဲ့ကြတာ ဖြစ်ကြောင်းလည်း လုံခြုံရေးကောင်စီ အလှည်ကျဥက္ကဋ္ဌ Estonia နိုင်ငံက ကုလသမဂ္ဂဆိုင်ရာ သံအမတ်ကြီး Sven Jurgenson က အထွေထွေညီလာခံကို ပြောဆိုထားပါတယ်။
364 Views
