ကိုယ်ဝန်ဖျက်ချခဲ့ပြီး အမှန်တကယ်နောင်တရသောအမျိုးသမီးများအား အပြစ်ခွင့်လွှတ်ပေးပိုင်ခွင့်အာဏာကို ရဟန်းမင်းကြီးဖရန်စစ်က ကက်သလစ်ရဟန်းတော်များအား ပေးအပ်တော်မူ

ဗာတီကန်၊ စက်တင်ဘာ ၁၊

ရဟန်းမင်းကြီးဖရန်စစ်အရှင်သူမြတ်က ““ကိုယ်ဝန်ဖျက်ချခဲ့ကြသော ကက်သလစ်ဘာသာဝင်အမျိုးသမီးများကို ““ကရုဏာ သနား ခြင်းနှစ်”” (ဒီဇင်ဘာ ၈ရက်၊ ၂၀၁၅ ခုနှစ်မှ နိုဝင်ဘာ ၂၀၊ ၂၀၁၆ ခုနှစ်အထိ) အတွင်းတွင် ထူးခြားသောအပြုအမူအဖြစ် အခွင့်လွှတ်ပေးကြရန်””  စက်တင်ဘာလ ၁ ရက်နေ့က ညွန်ကြားချက်ထုတ်ပြန်လိုက်သည်။

၎င်းညွန်ကြားချက်ထဲတွင် ကိုယ်ဝန်ဖျက်ချခဲ့ကြသော မိခင်များသည် ကက်သလစ် သာသနာတော်၏သွန်သင်ချက်ကို အာခံနေသော သံပီအူးအဖွဲ့အစည်း၏ ရဟန်းများထံတွင် အာပါတ်ဖြေခြင်းကို ပြုလုပ်နိုင်သည်ဟု ထည့်သွင်းဖော်ပြထားသည်။ ထိုကဲ့သို့သော ရဟန်းမင်းကြီး၏ ဖော်ပြထားခြင်းကို တချို့က ကက်သလစ်သာသနာတော်နှင့် သံပီအူးအဖွဲ့တို့အကြားတွင် ပြန်လည်သင့်မြတ်နိုင် မည့် အခြေအနေသို့ ရောက်ရှိနေကြောင်းကို မီးမောင်းထိုးပြခြင်းလည်း ဖြစ်နိုင်သည်ဟု သုံးသပ်နေကြသည်။

ရဟန်းမင်းကြီးဖရန်စစ်က သာသနာပြန့်ပွားရေးဌာနမှ ဥက်္ကဌဖြစ်တော်မူသော ဆရာတော်ကြီး ရီနိုဖိစိချယ်လာ အား ပေးပို့သော ညွန်ကြားစာတွင် ““ကရုဏာသနားခြင်းနှစ်”” တွင် မည်သူကိုမျှ ဖယ်ထုတ်ထားခြင်း မရှိကြောင်း၊ ယနေ့ခေတ် လူသားများ၏ အကြီး မားဆုံးသောပြသနာမှာ လူ့ဘဝ၏မြင့်မြတ်ခြင်းအပေါ် တန်ဖိုးမထားတတ်သောအတွေးအခေါ်ပင် ဖြစ်ကြောင်း၊ ကိုယ်ဝန်ဖျက်ချခြင်း ၏ဆိုးကျိုးကို လူတချို့က အပေါ်ယံသက်သက်သာ သတိထားကြပြီး ကြီးလေးသော ဆိုးကျိုးများ ပါဝင်သည်ကို အမှုမဲ့အမှတ်မဲ့ နေထိုင်နေကြကြောင်း၊ တဖက်တွင်လည်း မြောက်များစွာသော အမျိုးသမီးများသည် ကိုယ်ဝန်ဖျက်ချရန်မှတစ်ပါး မိမိတို့တွင် တခြားရွေးချယ်စရာ မရှိကြဟု ယုံကြည်လက်ခံနေကြကြောင်း၊ မိမိတွေ့ဆုံခဲ့သော အမျိုးသမီးများစွာ၏ စိတ်ထဲတွင် နာကျဉ်းခက်ခဲ သော ဆုံးဖြတ်ချက် (ကိုယ်ဝန်ဖျက်ချခြင်း) ကို ချခဲ့ရသည့်အမာရွတ်များကို ခံစားနေကြရသေးကြောင်း၊ ထိုကဲ့သို့သော အမျိုးသမီး များက ဝမ်းနည်းနောင်တရပြီး အာပါတ်ဖြေခြင်းစက်္ကရမင်းတူးတွင် အခွင့်လွှတ်ခြင်းကို လာရောက်ရှာဖွေလျှင်၊ ခမည်းတော်ဘုရား၏ အခွင့်လွှတ်ခြင်းကို ပေးကမ်းရမည် ဖြစ်ကြောင်း”” ဖြင့် ရေးသားဖော်ပြထားသည်။

ကက်သလစ်သာသနာတော်၏ကာနွန်ဥပဒေပြဌာန်းချက်အရ၊ ရဟန်းတော်တစ်ပါးသည် ကိုယ်ဝန်ဖျက်ချသော အမျိုးသမီး၏ အပြစ်ကို အခွင့်လွှတ်ရန်အတွက် ၎င်းရဟန်းတော်နှင့်ဆိုင်သော သာသနာပိုင်ဆရာတော်ထံမှ အထူးခွင့်ပြုချက်ကို ရရှိရန်လိုအပ်သည် ဟု ပြဌာန်း ထားသည်။ သို့သော် ရဟန်းမင်းကြီးဖရန်စစ်အရှင်သူမြတ်သည် ထိုကဲ့သို့သော ဥပဒေပြဌာန်းချက်ကို ““ကရုဏာသနားခြင်း နှစ်”” ၌ ချွင်းချက်အဖြစ်ထားရှိပြီး စစ်မှန်သော နောင်တစိတ်ဖြင့် အခွင့်လွှတ်ခြင်းကို ခံယူလိုကြသော ကိုယ်ဝန် ဖျက်ချသည့်အမျိုးသမီး များကို အခွင့်လွှတ်ရန် ရဟန်းတော်များအား အထူးအခွင့်အာဏာကို အပ်နှင်းပေးလိုက်ခြင်း ဖြစ်သည်။

ရဟန်းမင်းကြီးက စစ်မှန်ပြီး ရက်ရောသော ခမည်းတော်ဘုရား၏အခွင့်လွှတ်ခြင်းကို ရရှိရန်အတွက် မှန်ကန်သောအကျင့် တရား ပြောင်းလဲခြင်းလမ်းစဉ်ကို ကိုယ်ဝန်ဖျက်ချသောအမျိုးသမီးများအား လမ်းညွန်သွန်သင်ပေးခြင်းအားဖြင့် ကြီးလေးသောအပြစ် (ကိုယ်ဝန်ဖျက်ချခြင်း) ကို ကျူးလွန်ခဲ့ကြသော အမျိုးသမီးများကို ကြိုဆိုလက်ခံကြရန် ရဟန်းတော်များအား တိုက်တွန်းနှိုးဆော်ထား သည်။ ထိုကဲ့သို့သော ရဟန်းတော်များက ကိုယ်ဝန်ဖျက်ချသော အမျိုးသမီးများအား အပြစ်ခွင့်လွှတ်ခြင်းကို ၂၀၁၅ ခုနှစ် ဒီဇင်ဘာလ ၈ ရက်နေ့မှ ၂၀၁၆ ခုနှစ် နိုဝင်ဘာလ ၂၀ ရက်နေ့အထိ (တစ်နှစ်တိတိ) သာ တရားဝင်သည်ဟု ရဟန်းမင်းကြီးက ကန့်သတ်ထား သည်။

ဗာတီကန်ပြောရေးဆိုခွင့်ရှိသူဖြစ်သော ဘုန်းတော်ကြီးလွမ်ဘားဒီက ““ရဟန်းမင်းကြီးဖရန်စစ်၏ စာသည် ခမည်းတော်ဘုရား၏သနား ဂရုဏာ ကြီးမားနေခြင်းကို မီးမောင်းထိုးပြနေသကဲ့သို့ ကိုယ်ဝန်ဖျက်ချခြင်းအပြစ်၏ ကြီးလေးခြင်းကို လျှော့ပေါ့စေခြင်းလည်း မဟုတ်ကြောင်း”” ဖြင့် သတင်းထောက်များအား ရှင်းပြတော်မူသည်။ ၀၀၅ ကုန်ဇမှုန်း

1543  Views