လှည်းကူးတွင် လူ ၂၀၀ ကျော် အစုလိုက် ကိုဗစ် ကူးစက်

မြန်မာနိုင်ငံတွင် ကိုဗစ်တတိယလှိုင်း စလာပြီဖြစ်ကာ ရန်ကုန်တိုင်း၌ ကိုဗစ်ဖြစ်ပွားသည့်အနေဖြင့် လှည်းကူးမြို့ရှိ ကိုယ်ပိုင်ကျောင်းတခုတွင် အစုလိုက် ကူးစက်မှု ဖြစ်ပွားခဲ့ကြောင်း စစ်ကောင်စီ လက်အောက်ရှိ ကျန်းမာရေးနှင့် အားကစား ဝန်ကြီးဌာန ထုတ်ပြန်ချက်အရ သိရသည်။

ဇွန်လ ၁၃ ရက်က ကိုဗစ်ပိုးတွေ့ရှိမှု ၃၇၃ ဦးတွင်၂၂၆ ဦးဖြင့် ရန်ကုန်တိုင်းမှ အများဆုံးဖြစ်ပြီး အဆိုပါထဲမှ၂၁၁ ဦးသည် လှည်းကူးမြို့နယ်ရှိ ကိုယ်ပိုင်ကျောင်းတခုမှ ဖြစ်ကြောင်း သိရသည်။

အဆိုပါ ကိုယ်ပိုင်ကျောင်းတွင် ဇွန်လ ၁၀ ရက်နေ့၌ ကျောင်းသူတဦး အနံ့ပျောက်ရာကစပြီး ကူးစက်မှုများ စတင်ဖြစ်ပွားခဲ့ခြင်း ဖြစ်ပြီး ပိုးတွေ့ရှိသည့် ဆရာမတဦး လှိုင်သာယာဆေးရုံတွင် ကုသမှု ခံယူနေစဉ် သေဆုံးခဲ့ကြောင်း သိရသည်။

ထိုကျောင်းရှိ ဆရာ/ဆရာမ၊ ကျောင်းသား/ကျောင်းသူ ဝန်ထမ်း ၄၅၆ ဦးကို ကိုဗစ်ရောဂါပိုး စစ်ဆေးခဲ့ရာ၂၄၆ ဦးအထိ ကိုဗစ် ရောဂါပိုး တွေ့ရှိခဲ့ပြီး ၎င်းတို့အား သီးခြားခွဲထုတ်၍ လိုအပ်သည့် ကုသမှုပေးလျက် ရောဂါလက္ခဏာပေါ်လာပါက ဖောင် ကြီး ကိုဗစ်စင်တာ လှိုင်သာယာပြည်သူ့ဆေးရုံနှင့် လှည်းကူး ဆေးရုံများသို့ ပို့ဆောင် ကုသမည် ဖြစ်ကြောင်း သိရသည်။

လှည်းကူးမြို့နယ် လူမှုကယ်ဆယ်ရေး အဖွဲ့မှ အဖွဲ့ဝင်တဦးက “မဟော်သဓာကျောင်းက ထပ်ထွက်တာ။ သူက ကိုယ်ပိုင် ကျောင်း၊ ကျောင်းကြီးတယ်။ ကျောင်းသားဦးရေလည်း များတယ်။ အဆောင်တွေ ရှိတယ်။ ကိုယ်ပိုင်ကျောင်း အဲဒီမှာတင် နေရတာ။ ကျောင်းသား ၁ ဦး အနံ့ပျောက်ပြီးတော့ ဆရာမကိုလည်း ကူးတာပဲ” ဟု ဆိုသည်။

ကူးစက်မှုနှုန်းသည် ယခင် ဖြစ်ပွားခဲ့သော ဒုတိယလှိုင်းအတွင်း ကူးစက်မှုထက်ပင် ပိုမိုလျင်မြန်နေသည့်အတွက် မပေါ့ဆသင့်ကြောင်း ကူးစက်ရောဂါ တိုက်ဖျက်ရေးဌာန ညွှန်ကြားရေးမှူး ဒေါက်တာ ခင်ခင်ကြီးက ပြောသည်။

“အခုရောဂါဖြစ်ပွားမှုက အစုလိုက်ဖြစ်တယ် ဆိုကတည်းက သူ့ရဲ့ ကူးစက်ပျံ့နှံ့မှု (transmission) က များနေပြီ ဖြစ်ပါ တယ်။ ဒုတိယလှိုင်းထက်စာရင် ကူးစက်မှုတွေက မြန်တယ်။ မြန်တဲ့အပြင်ကို ဆေးရုံ တက်ရောက်ရမှုတွေ များတယ်။ ချင်းပြည်နယ်၊ ကျီးခါးမှာ စဖြစ်တုန်းကဆိုရင် ၁၁ ယောက် positive ဖြစ်တယ်။ ၇ ယောက် အောက်ဆီဂျင်ပေးရတဲ့ အနေအထား ဖြစ်တယ်။ ရောဂါပြင်းထန်မှုလည်း ရှိတယ်။ ဒါကြောင့်မို့လို့ မပေါ့ဆစေချင်ပါဘူး” ဟု ၎င်းက ဆိုသည်။

မြန်မာနိုင်ငံတွင် မေလ ၂၇ ရက်က စတင်ပြီး ကိုဗစ်တတိယလှိုင်း စတင်ဖြစ်ပေါ်နေခြင်း ဖြစ်ပြီး လက်ရှိအချိန်အထိ ရောဂါကာကွယ် ထိန်းချုပ်နိုင်သည့် အဆင့်တွင် ရှိနေသေးကြောင်း ကျန်းမာရေးနှင့် အားကစားဝန်ကြီးဌာနက သိရသည်။

“အခုအခြေအနေကတော့ တနိုင်ငံလုံးကို မထိန်းချုပ်နိုင်လောက်အောင် ပျံ့နှံ့နေတဲ့ အနေအထားမျိုး မဟုတ်ဘဲ အစုလိုက် အစုလိုက် ဖြစ်နေတဲ့ အနေအထားမျိုးလို့ ပြောရမှာ ဖြစ်ပါတယ်။ ဒီလိုအခြေအနေမှာ ကိုယ်က ထိန်းချုပ်နိုင်တယ်ဆိုရင် တော့ အဆိုးကြီး ဖြစ်သွားမှာ မဟုတ်ပါဘူး။ ထိန်းချုပ်တဲ့အခါမှာ ပြည်သူလူထု ကိုယ်တိုင်က ပူးပေါင်းဆောင်ရွက်မှု နည်းမယ်ဆိုရင်တော့ ကူးစက်မှု များသွားနိုင်ပါတယ်။ ကူးစက်မှု များမယ်ဆိုရင်တော့ ထိန်းချုပ်ဖို့ ခက်ခဲပါလိမ့်မယ်” ဟု ဒေါက် တာ ခင်ခင်ကြီးက ဆိုသည်။

ကျန်းမာရေးနှင့် အားကစားဝန်ကြီးဌာန ထုတ်ပြန်ထားချက်အရ မြန်မာနိုင်ငံတွင် ကိုဗစ်ကူးစက်မှု ရာခိုင်နှုန်းအားဖြင့် မေလ အတွင်း ကူးစက်မှုနှုန်း ၃ ရာခိုင်နှုန်းကျော်သာ ရှိရာမှ မေလ ၂၇ ရက်တွင် ပိုးတွေ့လူနာ ၉၆ ယောက်ဖြင့် ၅ ဒသမ ၃၇ ရာခိုင်နှုန်းအထိ စတင် တိုးလာခြင်းဖြစ်ပြီး ဇွန်လ ၁၃ ရက်တွင် ၁၂ ဒသမ ၉ ရာခိုင်နှုန်းဖြင့် ပိုးတွေ့သူ ၃၇၃ ဦးအထိ အမြင့်ဆုံး မြင့်တက်လာခြင်း ဖြစ်သည်။

ယမန်နေ့က တွေ့ရှိခဲ့သည့် ၃၇၃ ဦးသည် ရန်ကုန်တိုင်းတွင် ၂၂၆ ဦး၊ စစ်ကိုင်းတိုင်းတွင် ၇၉ ဦး၊ ပဲခူးတိုင်းတွင် ၂၉ ဦး၊ မန္တလေးတိုင်းတွင် ၁၃ ဦး၊ ရှမ်းပြည်နယ်တွင် ၁၃ ဦး၊ တနသာင်္ရီတိုင်းတွင် ၇ ဦး၊ ချင်းပြည်နယ်တွင် ၄ ဦး၊ ဧရာဝတီတိုင်းတွင် ၂ ဦး တို့ တွေ့ရှိခဲ့ခြင်း ဖြစ်ကြောင်း သိရသည်။

Stay at Home သတ်မှတ်ထားသည့် စစ်ကိုင်းတိုင်း အတွင်းရှိ တမူး၊ ကလေးမြို့နယ်နှင့် ချင်းပြည်နယ်အတွင်းရှိ တွန်းဇံ၊ ဟားခါး၊ ထန်တလန်၊ ဖလမ်းနှင့် တီးတိန် မြို့နယ်တို့ရှိ စာသင်ကျောင်းများကို ဇွန်လ ၇ ရက်မှ စတင်ကာ ပိတ်ထားပြီး လည်း ဖြစ်သည်။

ကိုဗစ်ရောဂါသည် ရန်ကုန်တိုင်းတွင် ဖြစ်ပွားမှု အများဆုံးဖြစ်ပြီး စစ်ကိုင်းတိုင်းသည် ဒုတိယ အများဆုံး ဖြစ်နေကာ၊ ချင်း ပြည်နယ်တွင်လည်း ဖြစ်ပွားမှုများနေကြောင်း သိရသည်။ ထို့ပြင် တနင်္သာရီတိုင်းနှင့် မွန်ပြည်နယ်အပြင် ရှမ်းပြည်နယ် အရှေ့ပိုင်း တာချီလိတ်တွင်လည်း ပိုးတွေ့လူနာများလာသည်ကို တွေ့ရကြောင်း ကျန်းမာရေးနှင့် အားကစား ဝန်ကြီးဌာနက သိရသည်။

တိုင်းနှင့် ပြည်နယ်များတွင် စစ်ကောင်စီ လက်အောက်ရှိ ကျန်းမာရေးနှင့် အားကစားဝန်ကြီးဌာနက Quarantine center များ စီစဉ်ထားမှုရှိပြီး လူဦရေ ထူထပ်များပြားသည့် ရန်ကုန်တိုင်းတွင် မြို့နယ် ၂၂ မြို့နယ် အတွင်း နေရာ ၃၇ နေရာစီစဉ် ထားရှိကာ လူဦးရေ ၃,၀၀၀ နီးပါးကို အသွားအလာ ကန့်သတ်ထားရှိနိုင်ရန် ဆောင်ရွက်ထားကြောင်း သိရသည်။

ကိုဗစ်ဒုတိယလှိုင်း ဖြစ်ပွားမှုတွင်း ကုသမှုကဲ့သို့ပင် ကိုဗစ်ပိုးတွေ့ရှိသူများကို ရောဂါအခြေအနေအေပါ် မူတည်ပြီး နေရာများ ခွဲခြား ကုသမှုကိုလည်း ဆောင်ရွက်သွားမည် ဖြစ်ကြောင်း ဒေါက်တာခင်ခင်ကြီးက ဆိုသည်။

ကိုဗစ်ပိုးတွေ့သော်လည်း ရောဂါလက္ခဏာ မပြသူများကို နေရာတခုတွင် သီးသန့်ခွဲထားမည်ဖြစ်ပြီး ရောဂါလက္ခဏာ အသင့်အတင့်ရှိပြီး ကုသမှုခံယူရန် လိုအပ်သူများကို မြို့နယ် ဆေးရုံများတွင် ထားရှိမည်ဖြစ်ကာ ရောဂါပြင်းထန်သည့် သူများအား ဖောင်ကြီးဆေးရုံ၊ ရန်ကုန်ဆေးရုံနှင့် မြောက်ဥက္ကလာပ ဆေးရုံများသို့ ပို့ဆောင်မည်ဖြစ်ကြောင်း သိရသည်။

ကိုဗစ်ကာကွယ်ဆေးထိုးခြင်းနှင့် စစ်ဆေးခြင်းလုပ်ငန်းများကို အာဏာသိမ်း စစ်ကောင်စီက ဆက်လက် ဆောင်ရွက်နေ သော်လည်း အဆိုပါ လုပ်ငန်းစဉ်တွင် ပြည်သူလူထု အများစုက ပူးပေါင်း ပါဝင်ခြင်း မရှိသလို အာဏာဖီဆန်ရေး လှုပ်ရှားမှု (CDM) ပြုလုပ်သည့် ကျန်းမာရေး ဝန်ထမ်းများကလည်း လုပ်ငန်းခွင် ပြန်ဝင်ခြင်း မရှိသေးပေ။ CDM တွင် ပါဝင်နေသည့် ဆရာဝန်နှင့် သူနာပြုများကို စစ်ကောင်စီက ဖမ်းဆီးမှုများ ရှိနေသလို ဆေးကုသခွင့် လက်မှတ် ပြန်သိမ်းခြင်းများလည်း ပြုလုပ်လျက် ရှိသည်။

၂၀၂၀ မတ် ၂၃ ရက်မှ ၂၀၂၁ ဇွန်လ ၁၃ ရက်အထိ မြန်မာနိုင်ငံတွင် COVID-19 ရောဂါ ဓာတ်ခွဲနမူနာ စစ်ဆေးသူ ၂,၆၄၈,၂၃၄ အနက်မှ အတည်ပြုလူနာ ၁၄၅,၆၀၃ ဦးရှိပြီး သေဆုံးသူ ၃,၂၄၄ ဦးနှင့် ဆေးရုံ ဆင်းခွင့်ရရှိသူ ၁၃၂,၉၂၈ ဦး ရှိပြီဖြစ်ကြောင်း ကျန်းမာရေးနှင့် အားကစားဝန်ကြီးဌာနက ထုတ်ပြန်ထားသည်။

 

Copy from: Irrawaddy News

639  Views