အယ်ဒီတာ့အာဘော် (Vol-3, No-32)
မြန်မာနိုင်ငံ၏ အနာဂါတ်အတွက် ကျွန်တော်စိုးရိမ်နေသည်
စစ်အစိုးရခေါင်းဆောင် ဗိုလ်ချုပ်မှူးကြီး သန်းရွှေသည် အရာရာကို သေချာတွက်ချက်ပြီးမှ မြန်မာ့ဒီမိုကရေစီလမ်းစကို စတင်ဖွင့်လှစ်ခဲ့ သည်ဟုသုံးသပ်မိသည်။ သူ၏ကိန်းကဏန်းအတွက်အချက်တွင် သူ၏အသက်အရွယ်၊ သူ၏စည်းစိမ်ဥစ္စာ၊ သူ၏လုံခြုံရေးနှင့် ဒေါ်အောင်ဆန်းစုကြည် ၏အသက်အရွယ်တို့ကို တွက်ချက်ပြီး ၂၀၀၈ ခုနှစ် အခြေခံဥပဒေကို အသက်သွင်းခဲ့သည်။
ပထမဆုံးသော ကိန်းကဏန်းတွင်မူ မြန်မာ့နိုင်ငံရေးကို ဦးသန်းရွှေ ကသာ ကိုင်ထားခဲ့သည်။ ဦးမောင်အေးက စစ်တပ်ရေးရာကို ကိုင်တွယ် ခဲ့ပြီး လူမှုရေးဆိုင်ရာကိစ္စများနှင့် လုံခြုံရေးကိစ္စများကို ဦးခင်ညွန့်က ကိုင်တွယ်ခဲ့သည်။ ထိုကဲ့သို့ နိုင်ငံရေးကို ကိုင်တွယ်ရာတွင် ဦးသန်းရွှေသည် စစ်အုပ်ချုပ်ရေးအာဏာကို မိမိ၏ အသက် ၇၅ နှစ်ရောက်မှ လက်လွှတ်ရန် စီစဉ်ခြင်းဖြစ်သည်။ တဖန် ၁၅ နှစ်ကြာ ရေးဆွဲခဲ့သော ဖွ့ဲစည်းပုံ အခြေခံဥပဒေကို အပြီးသတ်နိုင်ရန်နှင့် အတည်ပြုနိုင်သည့်အထိ ဒေါ်အောင်ဆန်းစုကြည်ကို ထောင်ချရန် အကွက်ချခဲ့သည်။ ၂၀၀၈ ခုနှစ် အခြေခံဥပဒေကို အတည်ပြုပြီးနောက် ရွေးကောက်ပွဲကိုကျင်းပပြီးမှသာ ဒေါ်အောင် ဆန်းစုကြည်ကို ထောင်ထဲမှ လွှတ်ပေးလိုက်သည်။
ဦးသန်းရွှေသည် ဒေါ်အောင်ဆန်းစုကြည်၏အသက်ကို တွက်ချက်သည်ဟု သုံးသပ်သည်။ ဒေါ်အောင်ဆန်းစုကြည်အား အသက် (၆၅) နှစ်အရောက်တွင် ထောင်ထဲမှလွှတ်ပေးပြီး နိုင်ငံရေးလောကထဲဝင်လာလျှင်တောင် အစိုးရသက်တမ်းက (၅) နှစ်ကာလ သတ်မှတ်ထားသောကြောင့် အစိုးရသက်တမ်းတစ်ခုအကုန်တွင် ဒေါ်စုသည် အသက် (၇၀) ရောက်ပြီးဖြစ်သည်။ နောက်ထပ်အစိုးရ သက်တမ်း (၁၀) နှစ်အရောက်တွင်မူ ဒေါ်စုသည် အသက် (၇၅) နှစ်ရှိပြီး နိုင်ငံရေးလောကတွင် ကြာကြာမလှုပ်ရှားနိုင်အောင် တွက်ချက်ထားသည်။ ထို့အပြင် သူသည် ဒေါ်အောင်ဆန်းစုကြည် အား မည်သည့်အခါမျှ သမ္မတမဖြစ်နိုင်ရန်အတွက် ၂၀၀၈ ခုနှစ် အခြေခံဥပဒေပုဒ်မ ၅၉ (စ) ကို ထည့်သွင်းထားခြင်းဖြစ်သည်။
ဒေါ်စုနှင့် သူမ၏ပါတီက ဖွဲ့စည်းပုံကိုပြင်ရန် လွှတ်တော်တွင်လုပ်ဆောင်ပါက သူမ၏တောင်းဆိုချက်ကို ဥပဒေအရ တရားဝင်မဲပေးပြီး ရှုံးရန်အတွက်နှင့် ဖွဲ့စည်းပုံအခြေခံဥပဒေကို မပြင်နိုင်ရန်အတွက် စစ်တပ်ကို လွှတ်တော်ထဲသို့ ပို့လိုက်ပြီး လွှတ်တော်အမတ်ဦးရေ၏ ၂၅%နှင့် စစ်တပ်မှ ဒုတိယသမ္မတကို ရယူရန် ၂၀၀၈ ခုနှစ် အခြေခံဥပဒေကို ပြဋ္ဌာန်းခဲ့သည်။ စစ်တပ်က ဦးသန်းရွှေ ၏ နိုင်ငံရေးကစားကွက်များကို လွှတ်တော်ထဲက စစ်တပ်ကလိုက်နာအကောင်အထည်ဖော်ရန်အတွက် မိမိကို ကျိုးနွံနာခံမည့် ဒုတိယဗိုလ်ချုပ်ကြီး မင်းအောင်လှိုင်အား ကာကွယ်ရေးဦးစီးချုပ်အဖြစ် ခန့်အပ်လိုက်ပြီးမကြာခင်တွင် သမ္မတဦးသိန်းစိန်က မင်းအောင်လှိုင်သည် ဗိုလ်ချုပ်မှူးကြီးအဆင့်သို့ ရာထူးတိုးမြင့်ခံရသည်။
ဦးသန်းရွှေသည် မိမိ၏နိုင်ငံရေးကစားကွက်ကို ဆက်လက်အကောင်ထည်ဖော်မည့် ဦးသိန်းစိန်အား သမ္မတရာထူးရအောင် ဖန်တီး ပေးလိုက်ပြီး နိုင်ငံရေးပါတီများကို ချုပ်ကိုင်နိုင်ရန်အတွက် ဒုတိယဗိုလ်ချုပ်ကြီး ဦးတင်အေးအား ပြည်ထောင်စုရွေးကောက်ပွဲ ကော်မရှင်၏ ဥက္ကဌ အဖြစ် ခန့်အပ်လိုက်သည်။ ဦးသိန်းစိန်က ဒေါ်စုအား ဟန်ပြတွေ့ဆုံပြီးနောက် နိုင်ငံတကာ၏ အားပေးမှုကို ရယူခဲ့သည့်အပြင် လွှတ်တော်ထဲတွင် ၂၀၀၈ ခုနှစ် အခြေခံဥပဒေကိုပြင်ဆင်ရာတွင် လိုအပ်သော မဲအရေအတွက်ကို မရနိုင်ရန်အတွက် လွှတ်တော်အမတ် (၃၀) ကျော်အား ဝန်ကြီး များအဖြစ် ခန့်အပ်လိုက်သည်။ ဦးသိန်းစိန်၏ နိုင်ငံရေးကစားကွက်ကို ပိုပြီးအားကောင်းစေရန်အတွက် ရွေးကောက်ပွဲကော်မရှင်ဥက္ကဌ ဦးတင်အေး က လစ်လပ်နေသော လွှတ်တော်အမတ် (၃၀) အတွက် သီးသန့်ရွေးကောက်ပွဲ မပြုလုပ်ပေးခဲ့ပေ။
ပြည်ထောင်စုလွှတ်တော်သည် ၂၀၀၈ ခုနှစ် ဖွဲ့စည်းပုံအခြေခံဥပဒေကို ပြင်ဆင်ရန် ၂၀၁၅ ခုနှစ် ဇွန်လ ၂၅ ရက်နေ့က မဲပေး ဆုံးဖြတ်ကြသောအခါ ရှေ့ကတင်ပြခဲ့သော လွှတ်တော်အမတ် (၃၀) နေရာ လစ်လပ်နေခြင်း၊ လွှတ်တော်အမတ်အချို့ ခွင့်ယူခြင်းနှင့် ၂၅% နေရာယူထားသော စစ်သားများက ပြင်ဆင်ရန်တင်ထားသော ပုဒ်မ ၅၉ (ဃ)၊ (စ)၊ ၄၃၆ စသောပုဒ်မများကို မဲပေးကြရာ တွင် ပုဒ်မ ၅၉ (ဃ) ကို ပြင်ဆင်ရန်အတည်ပြုပြီး တခြားပုဒ်မများကိုမူ မပြင်ဆင်ရန်မဲပေးကန့်ကွက်ခဲ့ကြသည်။
ထိုသို့သော ၂၀၀၈ ခုနှစ် ဖွဲ့စည်းပုံအခြေခံဥပဒေကို ပြည်ထောင်စုလွှတ်တော်က မပြင်ဆင်နိုင်သောကြောင့် ကျွန်ုပ်သည် ငြိမ်းချမ်း သော မြန်မာနိုင်ငံ၊ တိုင်းရင်းသားစည်းလုံးညီညွှတ်ရေးနှင့် စစ်တပ်နှင့် ပြည်သူအကြားတွင် ပိုမိုနီးကပ်စေရေးနှင့် အမျိုးသားပြန်လည် သင့်မြတ် စေရေးတို့သည် အနာဂါတ်တွင် ဝေးသွားတော့မည်ကို စိုးရိမ်နေမိတော့သည်။ ထို့ကြောင့် နိုင်ငံတော်သမ္မတဦးသိန်းစိန် နှင့် ဗိုလ်ချုပ်မှူးကြီး မင်းအောင်လှိုင် တို့အနေဖြင့် မြန်မာနိုင်ငံတွင် တိုင်းရင်းသားစည်းလုံးညီညွတ်ရေး၊ စစ်တပ်နှင့်ပြည်သူအကြားတွင် ပိုမိုနီးကပ်စေရေးနှင့် အမျိုးသားပြန်လည်သင့်မြတ်စေရေးနှင့် စစ်မှန်သော ဒီမိုကရေစီစနစ်ထွန်းကားရေးတို့ကို ဖော်ဆောင်ပေးကြပါရန် တိုက်တွန်းအပ်ပါသည်။
အယ်ဒီတာချုပ်
