ထောင်ထဲတွင် အချင်းချင်း ချစ်ချစ်ခင်ခင် နေကြရန်နှင့် မျှော်လင့်ချက်တွေ မကင်းမဲ့ကြရန် အကျဉ်းသားများအား ကာဒီနယ် တာကလေး အားပေးတော်မူ

 

မနီလာ၊ မတ်လ ၂၃၊ ၂၀၁၆

မနီလာမြို့၏ ကာဒီနယ် တာကလေးက ကမ္ဘာပေါ်တွင် အကျဉ်းသား အများဆုံး ထောင်တစ်ခုအဖြစ် နာမည်ကြီးသော မနီလာ ထောင်သို့ သွားရောက်ပြီး မျှော်လင့်ချက် မကင်းမဲ့ကြဘဲ ထောင်ထဲတွင် အကျဉ်းသား အချင်းချင်း ချစ်ချစ်ခင်ခင် နေထိုင်ကြရန် မတ်လ (၂၃) ရက်နေ့က တိုက်တွန်း တော်မူလိုက်သည်။

တာကလေးက “မိမိလည်း အမှားများစွာ ပြုလုပ်ခဲ့ကြောင်း၊ အပြစ်တွေ ပြုလုပ်ခဲ့ပါ ကြောင်း၊ ဒါပေမယ့် တစ်ရက်ကျရင် ထောင်ကနေ ပြန် လွတ်လာမယ် ဆိုတဲ့မျှော်လင့်ချက်ကို ထားရှိကြရန် လိုအပ်ကြောင်း၊ မိမိတို့သည် သစ္စာဖောက် နိုင်စွမ်းကြပေမယ့် မိမိတို့ တွင်လည်း သူများကို ချစ်နိုင်စွမ်း ရှိတယ်ဆိုတာ ကိုပါ မမေ့ကြဖို့ လိုအပ်ကြောင်း” ဖြင့် အကျဉ်းသားများအား အားပေး တော်မူပြီး သူတို့နှင့် အတူ မစ္ဆား ပူဇော်ခြင်းကို ကျင်းပပြုလုပ် ပေးတော်မူခဲ့သည်။

ကာဒီနယ် တာကလေးသည် အကျဉ်းထောင်ထဲရှိ ဘုရားဝတ်ပြုခန်းတွင် သနားကြင်နာခြင်း ဂျူဗလီတံခါးကို ဖိလစ်ပိုင်နိုင်ငံဆိုင်ရာ ဗာတီကန် သံအမတ်ကြီးနှင့် အတူ ဖွင့်လှစ်တော်မူရင်း “ဤတံခါးထဲသို့ ဝင်ရောက်ခြင်းသည် ယေဇူး ခရစ်တော် ဘုရား၏ နှလုံးသားထဲသို့ ဝင်  ရောက်ခြင်း ဖြစ်တော်မူပြီး ဘုရားသခင်က မိမိတို့အား မည်မျှပင် ချစ်တော်မူသည်ကို မြည်းစမ်း နိုင်ကြပါကြောင်း” ဖြင့် မိန့်ကြား တော်မူက “ကျွန်တော် တို့အားလုံးဟာလည်း ယုဒလို၊ ပီတာလို အပြစ် ပြုလုပ်ခဲ့ကြပါကြောင်း၊ သို့သော် မိမိတို့ကို အရှင်မြတ်၏ မိတ်ဆွေအဖြစ် ဂရုစိုက် တော်မူသော ခရစ်တော် ယေဇူးကဲ့သို့လည်း ဖြစ်နိုင်ကြပါကြောင်း” ဖြင့် မီးမောင်း ထိုးပြတော် မူခဲ့သည်။

နောက်ဆုံး အနေဖြင့် ကာဒီနယ် တာကလေးက အကျဉ်းသားများအား “မိမိတို့ရဲ့ မိသားစု တွေနဲ့ မိတ်ဆွေ တွေနဲ့ မိမိကြောင့် အနာတရ    ဖြစ်တဲ့ သူတွေအတွက်လည်း ဘုရားသခင်၏ သနား ကြင်နာခြင်းနှင့် မျှော်လင့်ခြင်းတို့ကို မြည်းစမ်း နိုင်ကြရန်အတွက် ဆုတောင်းပေးကြရန်၊ အကျဉ်းထောင် သည်လည်း မိသားစုနေသော အိမ်ကဲ့သို့ဖြစ်ပြီး အကျဉ်းထောင်ထဲတွင် အချင်းချင်း ချစ်ချစ် ခင်ခင်နေ ထိုင်ကြရန်နှင့်  နှုတ်ကပတ်တော် တို့ကိုဝေမျှကြရန်” မိန့်ကြားတော် မူသည်။ အကျဉ်းသားများကလည်း တာကလေးရှေ့၌ ရဟန်္တာဖရန်စစ် အစီစီ၏    ဆုတောင်းမေတ္တာကို ရွတ်ဆို တော်မူကြသည်ဟု သတင်းရရှိသည်။

ကမ္ဘာပေါ်တွင် အကျဉ်းသားအများဆုံး ထောင်တစ်ခုအဖြစ် နာမည်ကြီးသော မနီလာ ထောင်ထဲတွင် အကျဉ်းသား (၃၀၀၀) ကျော် ရှိနေ     ကြပြီးသည်ဟု သိရှိရသည်။          ကုန်ဇမှုန်း

1479  Views