ချင်းလူမျိုးတပ်များကသောင်းကျန်းသူများလက်ထဲသို့ ကျရောက်လုနီးပါးဖြစ်သော မြို့တော်ရန်ကုန်ကို အသက်ပေးကာကွယ်ပေးခဲ့ခြင်းဖြင့် ပြည်ထောင်စုသမ္မတမြန်မာနိုင်ငံတော်ကို ကာကွယ်ပေးခဲ့ရဟု သမိုင်းပညာရှင်ဒေါက်တာလျန်မှုန်းစခေါင်းက ပြောကြား

ရန်ကုန်၊ မေလ ၃၀၊ ၂၀၁၆

ရန်ကုန်မြို့ပေါ်ရှိ ချင်းလူမျိုးများက ပြည်ထောင်စုသမ်္မတမြန်မာနိုင်ငံတော်၏ ဒုတိယသမ်္မတ ဖြစ်သော ဟင်နရီဗန်ထီယိုးနှင့် ချင်း ပြည်နယ် ဝန်ကြီးချုပ်ဆလိုင်းဦးလျန်လွယ်တို့အား ဂုဏ်ပြုပွဲကို မေလ ၂၉ ရက်နေ့ ညနေ (၆) နာရီတွင် ရန်ကုန်ပြည်လမ်းမပေါ် ရှိ နိုဗိုတယ် ဟိုတယ်၌ ကြီးကျယ်ခမ်းနားစွာ ကျင်းပခဲ့ကြရာတွင် ချင်းလူမျိုးထဲမှ သမိုင်းပညာရှင်ဖြစ်သော ဒေါက်တာလျန်မှုန်းဆခေါင်းက ဘာကြောင့် ဒေါ်အောင်ဆန်းစုကြည်က ဒုတိယသမ်္မတ  ရာထူးကို ချင်းလူမျိုးအား ပေးရသလဲဆိုတာနဲ့ပတ်သက်ပြီး သမိုင်းကို အခြေခံက အောက်ပါအတိုင်းပြောကြားခဲ့သည်။

ဆက်လက်ပြီး သူက ““တချိန်က အင်္ဂလိပ်နယ်ချဲ့အစိုးရက မြန်မာနိုင်ငံကို ဝင်ရောက်သိမ်းပိုက်ခြင်းမပြုမီ၊ ၁၈၀၀ ခုနှစ် ဝန်ကျင်းတွင်မူ ချင်းလူမျိုးတို့သည် ကိုယ့်မင်းကိုယ့်ချင်း ဟူသော ဒေသဆိုင်ရာ စော်ဘွားများ၏ အုပ်ချုပ်မှု ပဒေသရာဇ်လက်ထဲတွင် လွတ်လပ် စွာ နေထိုင်ခဲ့ကြကြောင်း၊ သို့သော် အင်္ဂလိပ်နယ်ချဲ့အစိုးရက မြန်မာနိုင်ငံကို ဝင်ရောက်သိမ်းပိုက်ပြီးနောက် ချင်းပြည်နယ်သည် အင်္ဂလိပ်လက်ထဲကို ကျရောက်ခဲ့ကြောင်း၊ သို့ဖြင့် အင်္ဂလိပ်နယ်ချဲ့အစိုးရက မြန်မာနိုင်ငံကို လွတ်လပ်ရေး ပေးရန် ပြင်ဆင်လာစဉ်တွင် အင်္ဂလိပ်အစိုးရက ချင်းလူမျိုးများကို ရွေးချယ်စရာ (၃) ခုဖြစ်သော (၁) ဗမာပြည်နှင့်အတူတကွ လွတ်လပ်ရေး ရယူရန်၊ (၂) အင်္ဂလိပ်လက်အောက်တွင် ဆက်လက်နေထိုင်ပြီး ဖွံ့ဖြိုးတိုးတက်မှသာ လွတ်လပ်သောချင်းနိုင်ငံကို ထူထောင်ရန် (၃) ချင်းပြနယ်အောက်ပိုင်း (ယခု ချင်းပြည်နယ်) နှင့် ချင်းပြည်နယ်အထက်ပိုင်း (ယခုအိန္ဒိယနိုင်ငံရှိ မီဇိုပြည်နယ်) တို့နှစ်ခုကို ပူးပေါင်းပြီး ချင်းနိုင်ငံထူထောင် နိုင်ကြောင်းဟူသော အချက် (၃) ချက်အနက် အချက် (၁) ချက်ကိုသာ ရွေးယူဆုံးဖြတ်ရန် ချင်းလူ မျိုးခေါင်းဆောင်ကြီးများအား ဖိအားပေးခဲ့ကြကြောင်း၊ သို့သော် ဗိုလ်ချုပ်အောင်ဆန်း၏ အမျှော်အမြင်ကြီးမြင့်ခြင်းကြောင့် ဗိုလ်ချုပ်အောင် ဆန်းသည် ချင်းလူမျိုး ခေါင်းဆောင်ကြီးများထံသို့ သွားပြီး အချက် (၁) ကိုသာ ရွေးကာ ဗမာပြည်နှင့်အတူတကွ လွတ်လပ်ရေးရယူပြီး တန်းတူရည်တူ အခွင့်ကို ပေးမည်ဟု နားချစည်းရုံးခဲ့ခြင်းအပေါ် ချင်းလူမျိုးခေါင်းဆောင်ကြီးများက လက်ခံသဘောတူခဲ့ပြီးနောက် ကချင်နှင့်ရှမ်း လူမျိုးခေါင်းဆောင်များနှင့်အတူ ချင်းလူမျိုးခေါင်းဆောင်ကြီးများသည် ပင်လုံစာချုပ်ကို ဗိုလ်ချုပ်အောင်ဆန်းနှင့်အတူ ချုပ်ဆိုခဲ့ကြ ခြင်း ဖြစ်ကြောင်း၊ ထို့ကြောင့် ချင်းလူမျိုးများသည် ပြည်ထောင်စုကြီး ပြိုကွဲမှုကို လုံးဝလက်မခံခဲ့ကြကြောင်း”” ဖြင့် အကျယ်တဝင့် ပြောဆိုခဲ့သည်။

ဆက်လက်ပြီး လျန်မှုန်းဆခေါင်က ““လွတ်လပ်ရေးရပြီးနောက် ပင်လုံစာချုပ်၏ကတိကဝတ်များကို ဗမာအစိုးရအဆက်ဆက်က  အကောင်အထည် မဖော်ခဲ့သောကြောင့် တိုင်းရင်းသားများသည် တန်းတူအခွင့်အရေးကို ရရှိရန်အတွက် လက်နက်ကိုင် ပြီး တောင်းဆိုရာမှ ပြည်တွင်းစစ်များ ဖြစ်ပေါ်ခဲ့ပြီး အစိုးရရုံးစိုက်ရာရန်ကုန်မြို့ (ယခု နေပြည်တော်ကို အစိုးရရုံးစိုက်သော မြို့တော် အဖြစ် စစ်အစိုးရက တပ်မတော်နေ့ဖြစ်သော မတ်လ (၂၇) နေ့၊ ၂၀၀၆ ခုနှစ်တွင် သတ်မှတ်ကြေညာခဲ့သည်) သည် သောင်းကျန်းသူများလက်ထဲသို့ ကျရောက်လုနီးပါး ဖြစ်နေချိန်တွင် ချင်းလူမျိုးတပ်များက သောင်းကျန်းသူများကို အောင်မြင်စွာ တိုက်ထုတ်နိုင်ခဲ့ခြင်းကြောင့် ပြည်ထောင်စုမြန်မာနိုင်ငံသည် ယနေ့တိုင် အဓွန့်ရှည်နေရခြင်း ဖြစ်ကြောင်း၊ ထိုကဲ့သို့သော မြို့တော် ရန်ကုန်ကို အသက်စတေးပြီး ကာကွယ်ပေးခဲ့ခြင်းကြောင့် ချင်းလူမျိုးထဲမှ ဗိုလ်မှူးကြီးတိုက်ချွန်းသည် အောင်ဆန်းသူရိယဘွဲ့ကိုပင် ရရှိခဲ့ကြောင်း၊ ထိုကဲ့သို့သော ချင်းလူမျိုးများ၏ ပြည်ထောင်စုမြန်မာနိုင်ငံအပေါ် သစ်္စာရှိခဲ့ခြင်းကြောင့် ဒေါ်အောင်ဆန်းစုကြည် သည် ယခုလိုမျိုးဒုတိယသမ်္မတရာထူးကို ချင်းလူမျိုးများအား ပေးရခြင်း ဖြစ်သည်ဟု ပြောလိုပါကြောင်း”” ဖြင့် မီးမောင်းထိုးပြသည်။

အမျိုးသားဒီမိုကရေစီအဖွဲ့ ချုပ်ပါတီ၏နာယက သူရဦးတင်ဦးကလည်း ““မိမိသည် အငယ်တန်းစစ်သားဘဝထဲတွင် စစ်ဗိုလ် ပင် ဖြစ်သော်လည်း မိမိ၏လက်အောက်တွင် ရှိနေသော ချင်းလူမျိုးစစ်အရာခံဗိုလ်က မိမိအား သင်ကြားဆုံးမပေးခဲ့ကြောင်း၊ မိမိတွေ့ ဆုံအုပ်ချုပ်ခဲ့သော စစ်သားများထဲတွင် ချင်းလူမျိုးစစ်သားများသည် သစ်္စာအရှိဆုံးနှင့်အမှန်အတိုင်း ပြောဆိုနေထိုင် တတ်သူ များ ဖြစ်ကြကြောင်း၊ ဒါကြောင့်မို့ ထိုကဲ့သို့သော ရိုးသားပြီးသစ်္စာရှိတတ်သော အကျင့်မျိုးကို မျိုးဆက်သစ်ချင်းလူမျိုးများကလည်း ဆက်လက်ထိန်းသိမ်းကျင့်ကြံနေကြပါရန် မှာကြားလိုကြောင်း”” ဖြင့် အခမ်းအနားကို တက်ရောက်လာသော ချင်းလူမျိုးများအား မှာကြားခဲ့သည်။ ကုန်ဇမှုန်း

1347  Views