ဟားခါးကက်သလစ်သာသနာတွင် အနာဂါတ်ရဟန်းဆရာတော်များကို မွေးထုတ်ပေးမည့် အကြိုရဟန်းဖြစ်သင်ကျောင်းကို စတင်ဖွင့်လှစ်
ဟားခါး၊ ဇွန် ၁၉၊ ၂၀၁၆
ချင်းပြည်နယ်၊ ဟားခါးကက်သလစ်သာသနာပိုင်ဆရာတော်ကြီး လူးစီအူးစ်ဟရယ်ကုန်းသည် အနာဂါတ်ရဟန်းဆရာတော်များကို မွေး ထုတ်ပေးနိုင်ရန်အတွက် အကြိုရဟန်းဖြစ်သင်ကျောင်း Pre-Minor Seminary ကို ၂၀၁၆ ခုနှစ် မေလမှစတင်ပြီး ကျောဘူးရွာတွင် စတင်ဖွင့်လှစ်လိုက်ပြီ ဖြစ်သည်ဟု သတင်းရရှိပါသည်။
၎င်းရဟန်းဖြစ်သင်ကျောင်းနှင့်ပတ်သက်ပြီး ဟားခါးဆရာတော်၏အတွင်းရေးမှူးဖြစ်သော ဘုန်းတော်ကြီးလူးကားစ်အား တယ်လီဖုန်းဖြင့် ဇွန်လ (၁၉) ရက်နေ့က မေးမြန်းရာတွင် ““ဒီရဟန်းဖြစ်သင်ကျောင်းကတကယ်တော့ အကြိုရဟန်းဖြစ် သင်ကျောင်း ဖြစ်ကြောင်း၊ ကျောင်းအုပ်ဘုန်းတော်ကြီးအဖြစ် ဘုန်းတော်ကြီး ပီအူးစ် ကေးလျန်ကျုံးကို ခန့်အပ်ပြီး၊ ယခုနှစ်စာသင်နှစ် တွင်မူ ကျောင်းသားပေါင်း (၁၈) တက်ရောက်နေကြောင်း၊ ပထမနှစ်ဖြစ်တာမို့ ရှစ်တန်းကျောင်းသားများကို စတင်လက်ခံကြောင်း၊ ဒီကျောင်းကနေ အောင်မြင်သွားရင် ကလေးမြို့မှာ ရှိသော ရဟန်းဖြစ်သင်ကျောင်းသို့ ဆက်လက်တက်ရောက်ရမည် ဖြစ်သည်”” ဟု ရှင်းပြပါသည်။
ထိုကဲ့သို့ရဟန်းဖြစ်သင်ကျောင်းကို ဖွင့်လှစ်နိုင်ခြင်းနှင့်စပ်လျဉ်းပြီး ၎င်းဘုန်းတော်ကြီးလူးကားစ်၏ ရင်တွင်းခံစားချက်ကို မေးမြန်း ရာတွင် ““ရဟန်းဖြစ်သင်ကျောင်းဆိုတာ သာသနာတော်ရဲ့အသက်သွေးကြော ဖြစ်ကြောင်း၊ အခုလိုမျိုး ဟားခါးသာသနာမှာ ဖွင့်လှစ် နိုင်ခြင်းဟာ ဟားခါးသာသနာအတွက် ဘုရားသခင်ရဲ့ကျေးဇူးတော်တစ်ခု ဖြစ်ကြောင်း၊ သာသနာတိုင်းမှာ ရဟန်းဖြစ်သင်ကျောင်းက မရှိမဖြစ်လို အပ်ပြီး အနာဂါတ်ရဟန်းများကို မွေးထုတ်ပေးမည့်ကျောင်းအဖြစ် စတင်သမိုင်းဝင်တာမို့ အထူးဂုဏ်ယူမိကြောင်း”” ကို တယ်လီဖုန်းဖြင့် အမိန့်ရှိတော်မူသည်။
ဟားခါးကက်သလစ်သာသနာသည် ရဟန်းမင်းကြီး ယောဟန်ပေါလူး (၂)က ၁၉၉၂ ခုနှစ်၊ နိုဝင်ဘာလ (၂၁) ရက်နေ့တွင် စတင်ထူထောင်ပေးခဲ့ပြီး ပထမဆုံးဆရာတော်အဖြစ် ဆရာတော်ကြီးနီးကော်လပ်စ်မန်းထန် (လက်ရှိမန်္တလေးဂိုဏ်းချုပ် ဆရာတော်ကြီး) အား ခန့်အပ်ပေးခဲ့ပြီးနောက် ဆရာတော်ကြီးနီးကော်လပ်စ်မန်းထန်၏ ဦးဆောင်မှုဖြင့် ချင်းပြည်နယ်ရှိ ပြည်သူများ၏ ပိုမိုကောင်းမွန်သော ဘဝကို စတင်ဦးဆောင်လမ်းပြခဲ့ရာတွင် ဟားခါးသာသနာ၏ရဟန်းဖြစ်သင်ကျောင်းကို ကလေးမြို့ (လက်ရှိကလေးကက်သလစ် ဆရာတော်ကြီး ကျောင်းဝင်းနားတွင်ရှိသော Assumption Intermediate Minor Seminary ရဟန်းဖြစ်သင်ကျောင်း) တွင် စတင်ဖွင့်လှစ်ခဲ့သည်။
ထိုအချိန်မှစပြီး ကလေးကက်သလစ်သာသနာဟူ၍ဟားခါးသာသနာမှ ခွဲထွက်လိုက်သောအခါ ၎င်းရဟန်းဖြစ်သင်ကျောင်းသည် ကလေးသာသနာထဲတွင် ကျန်ရစ်ခဲ့သော်လည်း ဆရာတော်နှစ်ပါး၏သဘောတူညီချက်ဖြင့် ဟားခါးသာသနာမှ ရဟန်းလောင်းများ ကို ကလေးမြို့ရှိရဟန်းဖြစ်သင်ကျောင်းသို့ စေလွှတ်ရသည့်နည်းတူ ၎င်းကျောင်း၏ကျောင်းအုပ်ဘုန်းတော်ကြီးတချို့သည်လည်း ဟားခါး သာသနာမှ ရဟန်းများကို ခန့်အပ်ခဲ့ကြသည်။ ကုန်ဇမှုန်း
1736 Views
