ထောင်ကျနေကြသော အကျဉ်းသူ/သားများက ကက်သလစ်ဆရာတော်ရဟန်းတော်များကို တမ်းတနေ

၂၀၁၉ ခုနှစ်၊ ဖေဖော်ဝါရီလ၏ အယ်ဒီတာ့အာဘော်

မြန်မာနိုင်ငံတစ်ဝှမ်းလုံးတွင် အကျဉ်းထောင်မရှိသော ပြည်နယ်၊ သို့မဟုတ်၊ ဂိုဏ်းအုပ်သာသနာဟု ဆိုရသော် ချင်းပြည်နယ်နှင့်ဟားခါးကက်သလစ်သာသနာတို့သာ ဖြစ်ပေသည်။ တခြားတိုင်းဒေသကြီးများ၊ ပြည်နယ်များနှင့် ဂိုဏ်းချုပ်ဂိုဏ်းအုပ်သာသနာများတွင် အကျဉ်းထောင်များ ရှိနေကြသည်။

၎င်းအကျဉ်းထောင်များတွင် ကက်သလစ်ခရစ်ယာန်ဘာသာဝင် အကျဉ်းသားများလည်း ရှိနေကြသည်။ လွန်ခဲ့သော ၂၀၁၈ ခုနှစ်က သာယာဝတီထောင်ထဲသို့ ရောက်ရှိ သွားသော ဆလိုင်းမောင်ဂျွန်က ကက်သလစ်ခရစ်ယာန်ဘာသာဝင်အကျဉ်းသားများ (၅၀) ကျော်နှင့်တွေ့ဆုံရာတွင် ၄င်းအကျဉ်းသားများက မိမိတို့သည် ထောင်ထဲတွင် နှစ်ပေါင်း (၂၀) ရှိကြပြီဖြစ်သော်လည်း ကက်သလစ်ရဟန်း ထံမှ အာပတ်ဖြေခြင်းမင်္ဂလာနှင့်ကိုယ်တော်မြတ်ပင့်ယူခြင်းမင်္ဂလာတို့ကို (၁) ကြိမ်မျှသာ ခံယူရရှိခဲ့ဖူးကြသည်ဟု ရင်ဖွင့်ပြောဆိုကြသည်။

ဖေ့စ်ဘုတ်မှ မြင်တွေ့ရသလောက် ပြောရသော်၊ မိမိသိရသလောက်၊ အကျဉ်းထောင်များတွင် သွားရောက် ပြီး ကက်သလစ်ခရစ်ယာန်ဘာသာဝင်အကျဉ်းသူ/သားများအား ခရစ်စမတ်အကြိုမင်္ဂလာမြတ်များအား သွားရောက်ကျင်းပပေးသောဘုန်းတော်ကြီးများမှာ ဘုန်းတော်ကြီးနော်ဒင်နှင့် ကက်သလစ်ကက်သလစ် ဆရာတော်ကြီးဖေးလစ်လျန်ခဲန်းထန်လောက်သာ သိရှိရသေးသည်။

ပီတာနာမည်ခံယူသော အကျဉ်းသားက ““ကျွန်တော်က တစ်သက်တစ်ကျွန်း ထောင်ကျတာ။ ထောင်ထဲမှာ ရောက်နေတာ နှစ်ပေါင်း (၂၀) ကျော်ပြီ။ ဘယ်ကက်သလစ်ရဟန်းမှ မရောက်လာဘူး။ နှစ်ခြင်းခရစ်ယာန်တွေ ဖက်ကတော့ သင်းအုပ်ဆရာတွေ ရောက်လာပြီး ဘုရားလာရှိခိုးကြတယ်။ ၀ိညာဉ်ရေးစာစောင်တွေ ယူလာပေး တယ်။ ကျွန်တော်တို့ကို သတိရကြပါအုံးလို့ ဆရာတော်တွေနဲ့ရဟန်းတွေကို ပြောပေးပါ”” ဟု မောင်ဂျွန်အား မှာလိုက်သည်။

ထို့အပြင် သူတို့က မိမိတို့သည် ဘာသာရေးစာအုပ်စာပေများကိုလည်း ဖတ်ရှုလိုကြောင်းဖြင့် ပြောဆိုလာ ကြပြီးနောက် အယ်ဒီတာချုပ်ကိုယ်တိုင်လည်း မိမိထုတ်ဝေသော စာအုပ်များနှင့်ဂျာနယ်များကို လှူဒါန်း ပေးပို့ခဲ့ဖူးပါသည်။

မြန်မာနိုင်ငံကက်သလစ်ဆရာတော်ကြီးများအဖွဲ့ချုပ်၏တည်ဆောက်ပုံကိုကြည့်ရလျှင်လည်းကောင်း၊ ဂိုဏ်းချုပ်ဂိုဏ်းအုပ်ဆရာတော်သာသနာပိုင်များ၏ဖွဲ့စည်းပုံကော်မရှင်များအား ဖွဲ့စည်းပုံကိုကြည့်ရလျှင်လည်း ကောင်း၊ အကျဉ်းကျနေသော ကက်သလစ်ခရစ်ယာန်ဘာသာဝင်များအား ကူညီပံ့ပို့ပေးမည့် ကော်မရှင်များ မရှိသေးသည်ကို တွေ့ရှိရသည်။

ထို့အပြင် ၄င်းအကျဉ်းထောင်နှင့်နီးကပ်လျက်ရှိသော ရဟန်းပိုင်သာသနာများတွင် တာဝန်ထမ်းဆောင်နေ ကြသော ရဟန်းများသည်လည်း အကျဉ်းကျနေသော ကက်သလစ်ခရစ်ယာန်ဘာသာဝင်များအား ၀ိညာဉ်ရေး ဆိုင်ရာ မင်္ဂလာမြတ်များအား ပေးကမ်းခြင်းနှင့် ကာယရေးဆိုင်ရာလိုအပ်ချက်များကို ကူညီပံ့ပို့ခြင်းများလည်း မရှိကြသေးသည်ကို တွေ့ရှိရသည်။

နိုင်ငံရေးသည် ပြောင်းလဲလာသည်။ အကျဉ်းထောင်၏မူဝါဒပိုင်းများကိုလည်း ပြောင်းလဲစေလာခဲ့ပြီး အကျဉ်းကျသူများကိုလည်း မိမိတို့ဘာသာရေးဆိုင်ရာ ကိုးကွယ်မှုအတိုင်း ခံယူခွင့် ရရှိနေကြပြီဖြစ်သည်။ သို့သော် နိုင်ငံရေးပြောင်းလဲမှုအပေါ် လိုက်ပါပြောင်းလဲမှု အားနည်းနေသေးသူများမှာ ဘာသာရေးခေါင်းဆောင်များသာ ဖြစ်ကြသည်။

ထို့ကြောင့် မြန်မာနိုင်ငံအတွင်းရှိ ကက်သလစ်ဆရာတော်ကြီးများနှင့်ကက်သလစ်ရဟန်းများအနေဖြင့် မိမိတို့နယ်မြေထဲရှိ အကျဉ်းထောင်များတွင် ထောင်ကျနေကြသော ကက်သလစ်ခရစ်ယာန် ဘာသာဝင်များအား စက်္ကရမင်းများ၊ ဘာသာရေးဆိုင်ရာ ကူညီပံ့ပို့ခြင်းများကို စနစ်တကျဖွဲ့စည်းပြီး လုပ်ဆောင်ပေးကြပါရန် အရေးပေါ် တိုက်တွန်းအပ်ပါသည်။ အယ်ဒီတာချုပ်

130  Views
Previous: ဂလိုရီယာသတင်းဂျာနယ်တိုက်မိသားစုက မရမ်း-ပိတောက်စုကျေးရွာအား အရေးပေါ်လူနာတင်ယာဉ်တစ်စီးလှူဒါန်း
Next: (၂၀၁၈) ခုနှစ်အတွင်းက ဂလိုရီယာသတင်းဂျာနယ်ရဲ့အခြေအနေကို အစီရင်ခံခြင်း