တီးတိန်မြို့မှာ Mytel တာဝါတိုင်တွေ ဖျက်ဆီးခံရပြီးနောက် အင်တာနက်ပြတ်

Local
Sep 16, 2021

ချင်းပြည်နယ် (မြောက်ပိုင်း) တီးတိန်မြို့၊ ထုတ်လိုင်ကျေးရွာအနီးက မိုင်တယ် (Mytel) တာဝါတိုင်တစ်ခု စက်တင်ဘာ ၁၅ ရက်ဒီနေ့မှာ ဖောက်ခွဲဖျက်ဆီးခံခဲ့ရတယ်လို့ ဒေသခံတွေက RFA ကိုပြောပါတယ်။

စက်တင်ဘာ ၁၄ ရက်မနေ့ကတည်း တီးတိန်ပြည်သူ့ဆေးရုံအနီးက မိုင်တယ် (Mytel) တာဝါတိုင်ကို ပြည်သူ့ကာကွယ်ရေးတပ်ဖွဲ့ (PDF Zoland) အဖွဲ့က ဖျက်စီးခဲ့တယ်လို့ ဒေသခံတွေကဆိုပါတယ်။

တီးတိန်မြို့နယ်အတွင်းမှာ စက်တင်ဘာ ၉ ရက်နေ့ကနေ စက်တင်ဘာ ၁၅ ရက် ဒီနေ့အထိ တစ်ပတ်အတွင်း ဖောက်ခွဲဖျက်ဆီးခံခဲ့ရတဲ့ မိုင်တယ် (Mytel) တာဝါတိုင် ငါးခုရှိပြီလို့ ဒေသခံတွေကပြောပါတယ်။

အဲဒီ ဖောက်ခွဲဖျက်ဆီးမှုတွေကို PDF Zoland အဖွဲ့နဲ့ Civic Defense Militia အဖွဲ့တို့က လုပ်ခဲ့တာ ဖြစ်တယ်လို့ PDF Zoland အဖွဲ့က သတင်းထုတ်ပြန်ထားပါတယ်။

 

ချင်းပြည်နယ်‌မြောက်ပိုင်း တီးတိန်မြို့ ထုတ်လိုင်ကျေးရွာက ဖျက်ဆီးခံရတဲ့ Mytel တာဝါတိုင်ကို ၂၀၂၁ စက်တင်ဘာ ၁၅ ရက်နေ့က တွေ့ရစဉ်

 

လက်ရှိ တီးတိန်မြို့နယ်ထဲမှာ တာဝါတိုင်တွေ ဖျက်ဆီးခံခဲ့ရတာကြောင့် မိုင်တယ် (Mytel) အင်တာနက် လိုင်းတွေ သုံးလို့မရတော့ဘူးလို့ ဒေသခံတွေကပြောပါတယ်။

မြန်မာပြည်အလယ်ပိုင်းနဲ့ အထက်ပိုင်းက စစ်ကောင်စီကို တိုက်စစ်ဆင်နေတဲ့ မြို့နယ်တွေမှာလည်း မိုင်တယ် (Mytel) တာဝါတိုင်တွေ ဖျက်ဆီးခံရပြီးနောက် စက်တင်ဘာလ ၁၄ ရက် မနေ့ကစပြီး အင်တာနက်မြန်နှုန်း 3G ၊ 4G နဲ့ WTTH (broadband) တွေကို ပိတ်ထားဖို့ ဆက်သွယ်ရေးအော်ပရေတာတွေ အားလုံးကို စစ်ကောင်စီက ညွှန်ကြားထားပါတယ်။

RFA က စုံစမ်းရရှိထားတဲ့ အချက်အလက်တွေအရ စက်တင်ဘာလ ၄ ရက်နေ့ကနေ ဒီနေ့အထိအချိန် စစ်ကိုင်း၊ မန္တလေး၊ မကွေးစတဲ့ တိုင်းသုံးခုနဲ့ ရှမ်းပြည်နယ်တောင်ပိုင်း ဖယ်ခုံမြို့နယ်တွေအပြင် ချင်းပြည်နယ် က တီးတိန်မြို့ပါ အပါဆိုရင် ဖောက်ခွဲဖျက်ဆီးခံရတဲ့ ဆက်သွယ်ရေးတာဝါတိုင်ပေါင်း ၆၀ နီးပါးရှိပြီ ဖြစ်ပါတယ်။

498  Views
Previous: TIME မဂ္ဂဇင်းရဲ့ ကမ္ဘာ့လွှမ်းမိုးမှုအရှိဆုံး ပုဂ္ဂိုလ်တစ်ရာမှာ မြန်မာအမျိုးသမီး သုံးဦးပါဝင်
Next: Pope: Abortion is murder, the Church must be close and compassionate, not political