လက်နက်ကြီးကြောင့် မင်းတပ်မြို့ ဘုရားကျောင်းနှင့် နေအိမ် ၃ လုံးပျက်စီး
ချင်းပြည်နယ်၊ မင်းတပ်မြို့တွင် ယမန်နေ့ (စက်တင်ဘာ ၂၂) ညပိုင်းက တိုက်ပွဲဖြစ်ရာ ဘုရားရှိခိုးကျောင်းတစ်ခုနှင့် အဆောက်အအုံတချို့ လက်နက်ကြီးကျည် ထိမှန်ပျက်စီးသွားသည်။
ည ၇ နာရီကျော်၌ မြို့အရှေ့ပြင်ရပ်ကွက်ရှိ စစ်ကောင်စီတပ်ဖွဲ့ဝင်များကို CDF (မင်းတပ်) က ပြောက်ကျားဝင်ရောက်တိုက်ခိုက်ခဲ့ကြောင်း၊ စစ်ကောင်စီတပ်က လက်နက်ကြီးများဖြင့် ပြန်လည်ပစ်ခတ်ခဲ့ကြောင်း မင်းတပ်မြို့ပြည်သူ့အုပ်ချုပ်ရေးအဖွဲ့မှ ပြောရေးဆိုခွင့်ရှိသူက ပြောသည်။
“မင်းတပ်မြို့ အရှေ့ပြင်ရပ်ကွက်ထဲမှာ ဖြစ်တာများပါတယ်။ (ပစ်ခတ်တာ) နှစ်နေရာလောက်ဖြစ်မယ်။ လောလောဆယ် အတိအကျတော့ ပြောလို့မရသေးဘူး” ဟု ထိုသူက ဆိုသည်။
လက်နက်ကြီးထိမှန်မှုကြောင့် အရှေ့ပြင်ရပ်ကွက်ရှိ လူနေအိမ် ၃ လုံးထက်မနည်းနှင့် ယေဇူးရွှေနှလုံးတော် ခရစ်ယာန်ဘုရားကျောင်းဝင်းရှိ အဆောက်အုံတချို့ ပျက်စီးခဲ့သည်။
“တောင်တန်းကုန်းပေါ်ဆိုတော့ ထွေအုပ်ရုံးနဲ့လည်း အရမ်းနီးတယ်။ ရဲစခန်းနဲ့လည်း နီးတဲ့အခါကျတော့ (CDF) လူငယ်လေးတွေက လာပစ်တယ်ဆိုပြီးတော့ သူတို့(စစ်သားများ) ပစ်ကြတယ်ဆိုပါတော့” ဟု ယေဇူးရွှေနှလုံးတော်ခရစ်ယာန်ဘုရားကျောင်း ကျောင်းထိုင်ဆရာတော် ဖာသာရှယ်ထန်းက Myanmar Now ကို မိန့်သည်။
မင်းတပ်မြို့တွင် စစ်ကောင်စီ၏ ပစ်ခတ်မှုကြောင့် ဘုရားကျောင်းဝင်းအတွင်းရှိ အဆောက်အအုံတစ်ခု ကျည်ထိမှန်ထားသည်ကို စက်တင်ဘာ ၂၃ က တွေ့ရစဉ်။ (ဓာတ်ပုံ-ပေးပို့)
“ ကျည်ဆန်နည်းနည်းပါးပါး ဟိုထိဒီထိတော့ ထိတယ်။ သာသနာကျောင်းတိုက်အပေါ်ဘက်က မှန် နည်းနည်းပါးပါးထိတယ်။ နောက်ပြီးတော့ ကျောင်းဘေးမှာ လက်နက်ကြီးကျပြီးတော့ နည်းနည်းလေးကွဲသွားတယ်။ ပြတင်းပေါက်မှန်တွေထိတယ်”
ထိခိုက်ပျက်စီးသွားသော ဘုရားကျောင်းဝင်းကို ယနေ့ မနက်တွင် စစ်ကောင်စီတပ်ဖွဲ့ဝင်တချို့ လာရောက်ကြည့်ရှုသွားသည်ဟု ဖာသာက ဆိုသည်။
ယမန်နေ့ည ပစ်ခတ်မှုအတွင်း စစ်ကောင်စီဘက်မှ ထိခိုက်ဒဏ်ရာရမှု ရှိမရှိ မသိရသေးသလို စစ်ကောင်စီကလည်း သတင်းထုတ်ပြန်ခြင်း မရှိပေ။
အလားတူ ကန်ပက်လက်မြို့တွင်လည်း ယမန်နေ့ ည ၇ နာရီဝန်းကျင်၌ ရဲစခန်းနှင့် အထက်တန်းကျောင်း တို့မှာ တပ်စွဲထားသည့် စစ်တပ်က လက်နက်ကြီး၊ လက်နက်ငယ်များဖြင့် မြို့တွင်းသို့ ပစ်ခတ်၍ လူနေအိမ်တချို့ပျက်စီးခဲ့သည်။
“ကန်ပက်လက်မြို့ထဲကို ရမ်းပြီး လက်နက်ကြီးလက်နက်ငယ်တွေနဲ့ ပစ်တာပါ့။ ထိတွေ့တိုက်ပွဲတော့ မဟုတ်ဘူး”ဟု ကန်ပက်လက်မြို့ပြည်သူ့အုပ်ချုပ်ရေးအဖွဲ့ ပြောရေးဆိုခွင့်ရှိသူက အတည်ပြုသည်။
စက်တင်ဘာ ၁၈ က ထန်တလန်မြို့တွင် စစ်ကောင်စီတပ်နှင့် ထန်တလန် CDF တို့ တိုက်ပွဲဖြစ်ပြီး စစ်တပ်၏ ပစ်ခတ်မှုများကြောင့် လူနေအိမ် ၁၉ လုံးနှင့် ဆောက်လုပ်ရေး ရုံးရိပ်သာအဆောက်အအုံတစ်ခု မီးလောင်ပျက်စီးကာ ခရစ်ယာန်သင်းအုပ်ဆရာတစ်ဦး သေဆုံးခဲ့သည်။
စက်တင်ဘာ ၁၉ ကလည်း ဟားခါးနှင့် ထန်တလန် မြို့တွင်းတိုက်ပွဲများကြောင့် ဒေသခံ အရပ်သားများ ထိခိုက်သေဆုံးခဲ့သည့်အပေါ် လက်တုံ့ပြန်သည့်အနေဖြင့် မင်းတပ်မြို့ရှိ စစ်ကောင်စီတပ်ဖွဲ့ဝင်များကို မင်းတပ် CDF က ဝင်ရောက်တိုက်ခိုက်ခဲ့ပြီး စစ်ကောင်စီတပ်ဖွဲ့ဝင် ၂ ဦး သေဆုံးပြီး ထိခိုက်ဒဏ်ရာရမှုများရှိကြောင်း ထုတ်ပြန်ခဲ့သည်။
စစ်ကောင်စီတပ်များသည် ဒေသခံ CDF များနှင့် တိုက်ပွဲများပြင်းထန်နေသည့် ချင်းပြည်နယ်တွင် ခရစ်ယာန်ဘုရားကျောင်းများတွင် တပ်စွဲခြင်း၊ အရက်သောက်စားခြင်း၊ ကျမ်းစာအုပ်များကို ဖျက်ဆီးခြင်း၊ ဘုရားကျောင်းများကို ပစ်ခတ်ခြင်းများသည် ဘာသာရေးနှင့် လူမျိုးရေး ပဋိပက္ခအသွင်ဆောင်သည့် ဖြစ်ရပ်များ ဖြစ်စေနိုင်သည့်အတွက် အပြင်းအထန်ရှုတ်ချကြောင်း ချင်းနှစ်ခြင်းခရစ်ယာန်အဖွဲ့ချုပ်က စက်တင်ဘာ ၁၉ တွင် ထုတ်ပြန်သည်။
(လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့အကူအညီကို လိုအပ်နေပါတယ်။ ဒီနေရာကိုနှိပ်၍ လှူဒါန်းနိုင်ပါတယ်။)
ဟားခါး-CDF အဖွဲ့က ဆုရ်ခွာမြို့၏ကက်သလစ်ဘုန်းတော်ကြီး နိုအဲလ် ဟရန်တင်းထန်နှင့် ဓမ္မဆရာကလဲမင်းတိုဖမ်းဆီးခံရခြင်းအပေါ် ဆူရ်ခွာမြို့၏ သာရေးနာရေးကော်မတီ (နိုင်ငံတကာဆူရ်ခွာ) ၏ထုတ်ပြန်စာ
ဟားခါး – CDF (Chinland Defense Forces) အဖွဲ့က ဆုရ်ခွာမြို့၏ကက်သလစ်ဘုန်းတော်ကြီး နိုအဲလ် ဟရန်တင်းထန်နှင့် ဓမ္မဆရာကလဲမင်းတိုဖမ်းဆီးခံရခြင်းအပေါ် ဆူရ်ခွာမြို့၏ သာရေးနာရေးကော်မတီ (နိုင်ငံတကာဆူရ်ခွာ) ၏ထုတ်ပြန်စာ
=====================
ရက်စွဲ၊ ၂၀၂၁ ခုနှစ်၊ သြဂုတ်လ (၁)
—————————————————————-
ဟားခါး – CDF အဖွဲ့က ဆူရ်ခွာကက်သလစ်ဘုန်းတော်ကြီး နိုအဲလ် ဟရန်တင်းထန်နှင့်ဓမ္မဆရာကလဲမင်းတို့အား ဇူလိုင်လ (၂၆) ရက်နေဖမ်းဆီးခံရခြင်းအပေါ် ဆူရ်ခွာမြို့ သာရေးနာရေးကော်မတီ (နိုင်ငံတကာဆုရ်ခွာ) ၏ထုတ်ပြန်စာ (ဟားခါးချင်းဘာသာ) ကို အောက်ပါအတိုင်း မြန်မာဘာသာသို့ ပြန်ဆိုလိုက်ပါသည်။)
——————————————————————-
ဆုရ်ခွာမြို့၏ကက်သလစ်ဘုန်းတော်ကြီး နိုဘဲလ် ဟရန်တင်းထန်နှင့်ဓမ္မဆရာကလဲမင်းတို့အား ဖမ်းဆီးခံရခြင်း အပေါ် လူမှုကွန်ယက် (ဖေ့ဘုတ်) တွင် ရေးသားထားသော (အချက်သုံးချက်) များမှာ (က) ဘုန်းတော်ကြီးသည် မိမိကိုယ်ရေး ကိုယ်တာ ကိစ္စဖြင့် ဟားခါးမြို့သို့ သွားရာတွင် အဖမ်းခံရသည် (ခ) စစ်တပ်က သူ့ကို တွေ့ဆုံရန် ဖိတ်ခေါ် သောကြောင့် ဟားခါးသို သွားရာတွင် အဖမ်းခံရသည် (ဂ) ဘုန်းတော်ကြီးသည် စစ်တပ်နှင့်အဆက် အသွယ်ရှိသည်။ လူထုက တောထဲ တောင်ထဲသို့ ပြေးပုန်းနေချိန်တွင် ဘုန်းတော်ကြီးသည် မထွက်ပြေးဘဲ စစ်တပ်နှင့်အဆက်အသွယ်ရှိသည် ဟူသော အချက်များဖြစ်ကြသည်။
Fr. Noel Hrang Tin Thang
A Statement of Global Surkhua (Burmese Language)
အထက်ပါ စွပ်စွဲချက် (၃) ခုကို အောက်ပါအတိုင်း အများပြည်သူများ သိရှိနိုင်ရန် အသိပေးဖြေရှင်းအပ်ပါသည်။
၁။ ဆူရ်ခွာမြို့၏လုံခြုံဘေးအန္တရာယ် ကင်းရေးအတွက် မြို့ပေါ်ရှိ ဘာသာရေးဂိုဏ်းပေါင်းစုံများ စုပေါင်းပြီး သာရေးနာရေးနှင့် ကိုဗစ်ကပ်ဘေးရောဂါကို ကာကွယ်တိုက်ဖျက်နိုင်ရေးအတွက် ကော်မတီတစ်ခုကို မြို့မိမြို့ဖများက ဖွဲ့စည်းကြသည်။ ၎င်းကော်မတီ၏ လုပ်ငန်းများမှာ (၁) ကျန်းမာရေးနှင့် ဆိုင်သောစောင့် ရှောက်မှု (၂) ဘာသာရေးနှင့်ဆိုင်သောစောင့် ရှောက်မှု (၃) သာရေးနာရေးနှင့်ဆိုင်သောစောင့်ရှောက်မှုတို့ ဖြစ်ကြပြီး ၄င်းအစည်းအဝေးကို တက်ရောက်ကြသူအားလုံး က ဆူရ်ခွာကက်သလစ်ဘုန်းတော်ကြီး နိုအဲလ် ဟရန်တင်းထန် ကို ခေါင်းဆောင်အဖြစ် ရွေးချယ်ခဲ့ကြပါသည်။ ထိုကြောင့် ဆုရ်ခွာသာရေးနာရေးကော်မတီက ဘုန်းတော်ကြီး နိုအဲလ်ဟရန်တင်းထန်ကို ကိုဗစ်ကာကွယ်ဆေးများ သွားထုတ်ရန် အတွက် ဟားခါးမြို့သို့ စေလွှတ်လိုက်ခြင်း ဖြစ်ပါသည်။
၂။ သူသည် စစ်တပ်နှင့်တွေ့ဆုံရန်အတွက် ဟားခါးသို့ သွားရောက်ခြင်း မဟုတ်ဘဲ အထက်ဖော်ပြသော ကိုဗစ်ကာကွယ် ဆေးများ သွားထုတ်ရန်အတွက် ဟားခါးမြို့ သို့ သွားရောက်ခြင်း ဖြစ်ပါသည်။
၃။ ဆူရ်ခွာကက်သလစ်ဘုန်းတော်ကြီးနှင့်စစ်တပ်အကြား ဆက်သွယ်မှုရှိခြင်းနှင့်ပတ်သက်ပြီး၊ ဆူရ်ခွာမြို့ တစ်ဝိုက်တွင် တိုက်ပွဲဖြစ်နေချိန်တွင် ဘုန်းတော်ကြီး နိုအဲလ် ဟရန်တင်းထန်သည် မြို့ထဲရှိ သက်ကြီးရွယ်အိုများ နှင့်ဖျားနာသူများကို မိမိကားဖြင့် အိမ်ရာရောက် လိုက်ခေါ်ပြီး ကက်သလစ်ဘုရားကျောင်းဝင်းထဲတွင် ကက်သလစ်သီလရှင်များနှင့်အတူ ပြုစုစောင့်ရှောက် ပေးပါသည်။ ဒုတိယအကြိမ် တိုက်ပွဲဖြစ်နေချိန်တွင်မူ၊ ဆူရ်ခွာမြို့ပေါ်ရှိဘာသာရေးခေါင်းဆောင်များ သည် ဆုရ်ခွာမြို့ ဘေးကင်းလုံခြုံရေးအတွက် စစ်တပ်စခန်းချ သောနေရာသို့ သွားရောက်ကာ စစ်တပ်နှင့်သွားရောက် တွေ့ဆုံကြပါသည်။ ဟားခါးမှရောက်လာသောစစ်တပ်ခေါင်းဆောင်က ဘုန်းတော်ကြီးကို လိုအပ်မှုများ မေးမြန်းပြီးနောက်၊ စစ်တပ်ကို လာရောက် တွေ့ဆုံရန်နှင့် လာရောက်တွေ့ဆုံခြင်း မရှိပါက ဆူရ်ခွာမြို့ကို မီးရှို့ပြာကျစေမည်ဟု ခြိမ်းခြောက်လာပါသည် ။ ထို့ကြောင့် မြို့ပေါ်ရှိ ဘာသာပေါင်းစုံမှ ဘာသာရေးခေါင်းဆောင်များသည် ဟားခါးမှ စစ်တပ်အကြီးအကဲကို သွားရောက်တွေ့ဆုံကြခြင်း ဖြစ်ပါသည်။
၄။ ဆုရ်ခွာမြို့၏ကက်သလစ်ဘုန်းတော်ကြီး နိုအဲလ် ဟရန်တင်းတန်နှင့်ဓမ္မဆရာကလဲမင်းဟု ဖော်ပြချက်တွင်မူ သည် ဆုရ်ခွာမြို့တွင် တာဝန်ထမ်းဆောင်သူမဟုတ်ဘဲ ဒေါင်ဗားရွာတွင် တာဝန်ထမ်းဆောင်နေသော ၊ ဓမ္မဆရာကလဲမင်း ကက်သလစ်ခရစ်ယာန် ဓမ္မဆရာတစ်ပါး ဖြစ်ပါသည်။ သူသည် ဆုရ်ခွာမြို့သို့ စစ်တပ်ရောက်ရှိလာချိန်နှင့် ကိုဗစ်ကာကွယ် ရေးဆိုင်ရာလုပ်ငန်းအတွက် အစည်းအဝေးများတွင် တစ်ခါမျှ ပါဝင်သူ မဟုတ်ပါ။
၅။ ထို့ကြောင့် လူမှုကွန်ယက်တွင် ရေးသားကြရာတွင် ဆုရ်ခွာမြို့ ထဲတွင် ဖြစ်ပျက်သော အမှန်တရားများကိုသာ ကိုးကားရေးသားကြပါရန် အသိပေးအပ်ပါသည်။
ဆူရ်ခွာမြို့သာရေးနာရေးကော်မတီ
တစ်ကမ္ဘာလုံးဆိုင်ရာ ဆူရ်ခွာ
A Statement of Global Surkhua (Hakha Language)
