ဗာတီကန်သတင်းဌာနအတွက် မြန်မာနိုင်ငံ ကက်သလစ်ဆရာတော်ကြီးများအဖွဲ့ချုပ် ဥက္ကဌ ကာဒီနယ်ချားလ်စ်ဘို၏ ဖြေကြားချက်

ဗာတီကန်သတင်းဌာနအတွက် မြန်မာနိုင်ငံ ကက်သလစ်ဆရာတော်ကြီးများအဖွဲ့ချုပ် ဥက္ကဌ ကာဒီနယ်ချားလ်စ်ဘို၏ ဖြေကြားချက်

******************************************

စစ်အာဏာသိမ်းခဲ့တာ (၁)နှစ်တင်းတင်းပြည့်တော့မယ့်အချိန်မှာ မြန်မာနိုင်ငံကက်သလစ် ဆရာတော်ကြီးများအဖွဲ့ချုပ်ရဲ့ဥက္ကဋ္ဌအနေနဲ့ ဘယ်လိုခံစားရှုမြင်ပါသလဲ။

ကျွန်ုပ်တို့အနေနဲ့ အရမ်းကိုပဲ ပူပန်သောကရောက်ရပါတယ်။ မြန်မာနိုင်ငံ ကက်သလစ် ဆရာတော်ကြီးများအဖွဲ့ချုပ်အနေနဲ့လည်း ငြိမ်းချမ်းရေးနဲ့ ပြန်လည်သင့်မြတ်ရေး လမ်းစဉ်ကို လိုက်ကြဖို့ တိုက်တွန်းတဲ့သဘောထားကို ထုတ်ပြန်ခဲ့ပြီးလည်းဖြစ်ပါတယ်။ စစ်အာဏာ သိမ်းပြီး (၁)နှစ်အကြာမှာ ပြည်သူပြည်သားတွေခံစားခဲ့ရတဲ့ဒုက္ခတွေဟာ အရမ်းကိုကြီးမား လွန်းပါတယ်။ ကျွန်ုပ်တို့ပြည်သူတွေရဲ့ဘ၀ဟာ ဒုက္ခကားတိုင်လမ်းကို လျှောက်နေရသလို ပါပဲ။ သာယာလှပတဲ့ ဧဒင်ဥယျာဉ်အဖြစ်ကနေ ကာလ်ဝါရီလူသတ်ကုန်းအဖြစ်ကို ပြောင်းလဲသွားခဲ့တာပါ။ ကက်သလစ်ဆရာတော်ကြီးများအနေနဲ့ ကျွန်ုပ်တို့ဟာ ပြည်သူတွေနဲ့ အတူ ရှိနေပြီး လူသားချင်းစာနာတဲ့ အကူအညီတွေပေးနိုင်ဖို့ ကြိုးစားနေကြပါတယ်။ သက်ဆိုင်တဲ့ဘက်အားလုံးကိုလည်း ငြိမ်းချမ်းရေးနဲ့ ပြန်လည်သင့်မြတ်ရေးလမ်းစဉ်ကို လျှောက်လှမ်းကြဖို့ တိုက်တွန်းနေပါတယ်။

မြန်မာနိုင်ငံရဲ့ လက်ရှိအခြေအနေနဲ့ ပြည်သူပြည်သားတွေရဲ့ခံစားချက်ကို ဘယ်လိုမျိုးပုံ ဖော်ပြလို့ ရမလဲ။

ဘယ်လိုမှ လက်ခံလို့မရတဲ့အခြေအနေမျိုးရောက်နေပြီလို့ ပြောချင်ပါတယ်။ လူထုဘ၀ ဟာ ပြင်းထန်တဲ့ပဋိပက္ခတွေနဲ့ ဆိုးဝါးတဲ့ဒုက္ခတွေကြောင့် ဆောက်တည်ရာမရ ဖြစ်နေကြပါပြီ။ ကမ္ဘာ့စားနပ်ရိက္ခာအဖွဲ့နဲ့ ကုသမဂ္ဂအဖွဲ့အစည်းတွေကလည်း စစ်ဘေးရှောင်နေတဲ့ ဒုက္ခသည် ဦးရေဟာ (၃)သိန်းအထိ ရှိလာပြီး လူသန်းပေါင်းများစွာလည်း စားရေးသောက်ရေး ခက်ခဲလာတဲ့အကြောင်း ပြောဆိုနေကြပါတယ်။ ကျွန်ုပ်တို့ပြည်သူတွေဟာ မိမိတို့ရဲ့စားဝတ် နေရေးနဲ့ အသက်အန္တရာယ်အတွက်ပါ စိုးရိမ်ကြောက်လန့်နေကြရပါပြီ။ ပြီးခဲ့တဲ့ ခရစ္စမတ်သတင်းစကားမှာ ကျွန်ုပ်ပြောခဲ့သလို မြန်မာတစ်နိုင်ငံလုံးဟာ တကယ့်ကို စစ်တလင်းဖြစ်နေပါပြီ။

တိုင်းရင်းသားလူမျိုးစုဒေသတွေက ခရစ်ယာန်တွေနဲ့ ကက်သလစ်ဘာသာဝင်တွေရဲ့ အခြေအနေ ကိုရော ပြောပြပေးလို့ရမလား။

အရမ်းကို စိတ်နှလုံးကြေကွဲရပါတယ်။ အဲဒီဒေသတွေတိုက်ခိုက်ဖျက်ဆီးခံရတဲ့အကြောင်း ကို မီဒီယာတွေမှာလည်း ဖော်ပြခဲ့ပြီးဖြစ်ပါတယ်။ ဘုရားရှိခိုးကျောင်းတွေကိုတောင် ချမ်းသာ မပေးခဲ့တဲ့အတွက် ဘုရားကျောင်းအထဲမှာတင် သေဆုံးခဲ့ရသူတွေတောင် ရှိခဲ့ပါတယ်။ ဘုရားကျောင်းတွေ ဗုံးဆံနဲ့ အမြှောက်ဆံသင့်ခဲ့ရတာတွေ၊ ခရစ္စမတ်ပွဲတော်ကျင်းပဖို့ သွားနေကြတဲ့သူတွေကို ခရစ္စမတ်ရက်တွေမှာပဲ လူမဆန်စွာ သတ်ဖြတ်ခဲ့တာတွေအတွက် မြန်မာနိုင်ငံကက်သလစ်ဆရာတော်ကြီးများအဖွဲ့ချုပ်က ရှုတ်ချကန့်ကွက်ခဲ့ပါတယ်။ ခရစ်ယာန်ဘာသာဝင်အများစု နေတဲ့ဒေသတွေမှာလည်း စစ်ဘေးရှောင်အရေအတွက် သိသိသာသာ များပြားလာပါပြီ။

မြန်မာနိုင်ငံဟာ လက်ရှိအခြေအနေကနေ လွန်မြောက်တော့မယ်လို့ ကျွန်ုပ်တို့မျှော်လင့်လို့ရ မလား။

မြန်မာပြည်သူတွေဟာ စိတ်ထင်တိုင်း ဖျက်ဆီးသတ်ဖြတ်ခံနေရတဲ့ဘ၀ကို ရင်ဆိုင်ဖြတ် သန်းနေကြရပါတယ်။ မတရားအကြမ်းဖက်မှုအားလုံး ရပ်တန်းက ရပ်သင့်ပါပြီ။ နိုင်ငံနဲ့ ပြည်သူ တွေဟာ အကြမ်းဖက်မှုနဲ့ ဒုက္ခတွေကို ဆက်ပြီးခံထမ်းနိုင်တော့မယ် မထင်ပါဘူး။ ပါဝင်ပတ် သက်သူအားလုံး ငြိမ်းချမ်းရေးနဲ့ ပြန်လည်သင့်မြတ်ရေးလမ်းစဉ်ကို လိုက်ကြဖို့ ကျွန်ုပ်မျှော်လင့် ဆုတောင်းနေပါတယ်။

ဒီလိုကာလမှာ မြန်မာပြည်သူပြည်သားတွေ၊ ခရစ်ယာန်တွေ၊ စစ်ခေါင်းဆောင်တွေနဲ့ နိုင်ငံတကာ အသိုင်းအဝိုင်းကို ဘယ်လိုသတင်းစကားပါးချင်ပါသလဲ။

မြန်မာပြည်သူပြည်သားတွေကို ပြောလိုတာကတော့ သင်တို့ခံစားနေရတဲ့ ဒုက္ခတွေ၊ နာ ကျည်းမှုတွေ၊ ဝေဒနာတွေ၊ အစာရေစာပြတ်လပ်တာတွေကို ကျွန်ုပ်တို့သိရှိခံစားနေရပါတယ်။ တွေ့ကြုံနေရတဲ့အခြေအနေတွေကို သင်တို့စိတ်ပျက်ပြီး အလျှော့မပေးတော့ဘဲ ပြန်လည်ခုခံနေ ကြတာတွေကိုလည်း ကျွန်ုပ်တို့နားလည်ပါတယ်။ ဒါပေမဲ့ လက်နက် ကိုင်တော်လှန်ရေးလမ်းစဉ် တစ်ခုတည်းကိုသာ စွဲကိုင်လိုကြသူတချို့ကို ပြောလိုတာကတော့ ကျွန်ုပ်တို့မှာ ရွေးချယ်စရာ တခြားနည်းလမ်းတွေရှိပါတယ်လို့ ပြောချင်ပါတယ်။

ခရစ်ယာန်ဘာသာဝင်တွေကို ပြောလိုတာကတော့ သင်တို့ ဒီတစ်ခါခံထမ်းရတဲ့ဒုက္ခဟာ အရမ်းကို ကြီးမားလွန်းပါတယ်။ သင်တို့လျှောက်လှမ်းနေရတဲ့ ကားတိုင်းလမ်းမှာ အသင်းတော်ဟာ သင်တို့နဲ့အတူ ရှိနေပါတယ်။ ဒါပေမဲ့ အသင်းတော်အနေနဲ့၊ ခရစ်ယာန် ဘာသာဝင်တွေ အနေနဲ့ ကျွန်ုပ်တို့ဟာ ပုပ်ရဟန်းမင်းကြီးရဲ့လမ်းညွှန်ချက်ကို နာခံကြရ ပါတယ်။ မိမိကိုယ်တိုင်က ဒဏ်ရာနဲ့ပြည့်နေပေမဲ့ ကုသပေးနေမြဲဖြစ်တဲ့ သမားတော်ဘ၀မျိုး ခံယူကြပါ။ ကိုယ်ကိုယ်တိုင်က ငြိမ်းချမ်းခြင်းလက်နက်ဖြစ်စေဖို့ ကြိုးပမ်းကြပါ။ စိတ်ပျက်အားလျော့ဖွယ်ကောင်းတဲ့အမှောင်ထုကြီးထဲမှာ မျှော်လင့်ခြင်းအလင်းကို ထွန်းညှိ ကြပါ။

တပ်မတော်ဘက်က ခေါင်းဆောင်တွေကို ပြောလိုတာကတော့ အသင်းတော်ဟာ လူအများ စုရဲ့အကျိုးအတွက် ရပ်တည်နေပါတယ်။ ပြဿနာအားလုံးကို တရားနည်းလမ်းကျကျ ငြိမ်းချမ်းစွာ ဆွေးနွေးအဖြေရှာဖို့ အသင်းတော်က လိုလားပါတယ်။ ဆွေးနွေးညှိနှိုင်းကြဖို့၊ ဖမ်း ဆီးထားသူတွေကို ပြန်လွှတ်ပေးဖို့၊ လွတ်လပ်စွာ ထုတ်ဖော်ပြောဆိုခွင့်နဲ့ အခြေခံလူ့အခွင့် အရေးအားလုံးကို လေးစားကြဖို့ကို ကျွန်ုပ်တို့ အမြဲမပြတ် တိုက်တွန်း နေပါတယ်။ ဒုက္ခရောက် နေတဲ့ ပြည်သူပြည်သားတွေဆီကို လူသားချင်းစာနာမှု အကူအညီတွေ အမြန်ဆုံးရောက်ရှိစေဖို့ ဆောင်ရွက်ပေးကြပါ။

နိုင်ငံတကာအသိုင်းအဝိုင်းကို ပြောလိုတာကတော့ အစောပိုင်းကာလတွေမှာ မြန်မာ့ အရေးကို ကမ္ဘာက စိတ်ဝင်တစားရှိခဲ့ကြပေမဲ့ နောက်ပိုင်းမှာတော့ ကမ္ဘာ့နိုင်ငံရေးဇာတ်ခုံပေါ် မှာ မြန်မာဟာ တဖြည်းဖြည်းပျောက်ကွယ်လာပါတယ်။ တခြားသော ပဋိပက္ခဒေသတွေ ဆီကို အာရုံတွေပြောင်းကုန်ကြပါတယ်။ ဒါပေမဲ့ ကျွန်ုပ်တို့ခံစားနေရတဲ့ဒုက္ခတွေ ပျောက်ကွယ်မသွား သေးပါဘူး။ မြန်မာနိုင်ငံကို ပြန်သတိရပြီး ပြည်သူပြည်သားတွေရဲ့ ဒီမိုကရေစီနဲ့ ငြိမ်းချမ်းရေး ကြိုးပမ်းမှုတွေကို ကူညီထောက်ပံ့ပေးကြပါ။ စစ်လက်နက် ပစ္စည်းတွေထပ်မပို့ကြပါနဲ့။ လူသား ချင်းစာနာမှုအကူအညီတွေ ပိုမိုရရှိစေဖို့ ဦးဆောင်ကူညီ ပေးကြပါ။

ငြိမ်းချမ်းရေးလမ်းစဉ်နဲ့ ဖြေရှင်းလို့ရပါတယ်။ ငြိမ်းချမ်းရေးလမ်းစဉ်သည်သာ တစ်ခု တည်းသောနည်းလမ်းဖြစ်ပါတယ်။

အားလုံးကို ကျေးဇူးတင်ပါတယ်။

အငြိမ်းစားဆရာတော်ကြီး ဖရန်စစ်ဒေါ့တန်က မိမိသည် ဗာတီကန်နန်းတော်မှမျှတသောတရားစီရင်မှုကို မရရှိဟုခံစားရ

မြန်မာနိုင်ငံမြောက်ပိုင်းမြစ်ကြီးနားကက်သလစ်ဂိုဏ်းအုပ်သာသနာမှ အငြိမ်းစားဆရာတော်ကြီး ဖရန်စစ်ဒေါ့တန် က မိမိသည် ဗာတီကန်နန်းတော်မှမျှတသောတရားစီရင်မှုကို မရရှိဟု ခံစားရကြောင်း ကြားသိရပါသည်။ သူ၏ခံစားချက်နှင့်စပ်လျဉ်းပြီး ဂလိုရီယာသတင်းဂျာနယ်တိုက်က ဆရာတော်ကြီးကို အီးမေးလ်ဖြင့် ဆက်သွယ်မေးမြန်းရာတွင် ဆရာတော်ကြီးက ပြန်လည်ဖြေကြားခြင်းတော့ မပြုလုပ်ပေ။

မြစ်ကြီးနားကက်သလစ်ဂိုဏ်းအုပ်သာသနာမှ အငြိမ်းစားဆရာတော်ကြီး ဖရန်စစ်ဒေါ့တန်

ရဟန်းမင်းကြီးအရှင်သူမြတ်က မြစ်ကြီးနားကက်သလစ်ဂိုဏ်းအုပ်သာသနာမှဆရာတော်ကြီး ဖရန်စစ်ဒေါ့တန်၏ ကျန်းမာရေးအခြေအနေကြောင့် အလုပ်တာဝန်မှအနားယူရန်တောင်းဆိုမှုအပေါ် ရဟန်းမင်းကြီးက ခွင့်ပြုလိုက်သည်ဟု ၂၀၂၀၊ နိုဝင်ဘာ ၁၈ ရက်တွင် မြန်မာနိုင်ငံကက်သလစ်ဆရာတော်ကြီးများအဖွဲ့ချုပ်ရုံးက ကြေငြာခဲ့သည်။

ရဟန်းမင်းကြီးသည် ရန်ကုန်ကက်သလစ်ဂိုဏ်းချုပ်ဆရာတော်ကြီး ကာဒီနယ်ချားလ်စ်ဘိုအား မြစ်ကြီးနားကက်သလစ်ဂိုဏ်းအုပ်သာသနာ၏တာဝန်ခံဆရာတော်အဖြစ် ၂၀၂၀ ခုနှစ်၊ နိုဝင်ဘာလ (၁၈) ရက်နေ့က ခန့်အပ်တော်မူလိုက်သည်။

သို့သော်သူ၏ မြစ်ကြီးနားကက်သလစ်ဂိုဏ်းအုပ်သာသနာမှ တချို့သောဘုန်းတော်ကြီးများနှင့်ပြည်သူလူထုက ဆရာတော်ကြီး ဖရန်စစ်ဒေါ့တန်သည်ကျန်းမာနေပြီး ဆရာတော်ဖြစ်လိုသော သူ၏အတွင်းလူဆိုးရဟန်းများကမြေယာ၀ယ်ခြင်းနှင့်ရောင်းချခြင်းဆိုင်ရာကိစ္စရပ်များအတွက် ရဟန်းမင်းကြီးအား တိုင်ကြားသတင်းပို့ခြင်းကြောင့်အနားယူခိုင်းခဲ့သည် ဟု ပြောဆိုနေကြသည်။

၂၀၂၁ ခုနှစ်၊ ဖေဖော်ဝါရီလတွင် ကျင်းပပြုလုပ်သော မြစ်ကြီးနားကက်သလစ်ဂိုဏ်းအုပ်ဆရာတော်ပိုင်အစည်းအဝေးတွင် ဆရာတော်ကြီးဖရန်စစ်ဒေါ့တန်က မိမိကို စုံစမ်းစစ်ဆေးပြီးနောက် မြစ်ကြီးနားဂိုဏ်းအုပ်သာသနာတာဝန်ခံဆရာတော်ဖြစ်လာသော ကာဒီနယ်ချားလ်စ်ဘိုအား၊ အစည်းအဝေးတက်ရောက်သူများရှေ့မှာပဲ၊ အောက်ပါမေးခွန်းကို မေးမြန်းလိုက်သည်ဟု သိရသည်။

မြစ်ကြီးနားကက်သလစ်ဂိုဏ်းအုပ်သာသနာ၏တာဝန်ခံဆရာတော်၊ ကာဒီနယ်ချားလ်စ်ဘို

ကာဒီနယ်ဘုရား၊ တပည့်တော်က ဘာတွေကျူးလွန်လို့ ဒီလိုအနားပေးခံရတာလဲ။ ဘိန်းရောင်းတဲ့သူတွေ၊ လူသတ်သမားတွေတောင် တရားရုံးမှာ ရှေ့နေဌားပြီး ချေပဖြေရှင်းပိုင်ခွင့် ရတယ်။ ဘာဖြစ်လို့ ကျွန်တော်က ဖြေရှင်းပိုင်ခွင့် မရတာလဲ။ ကျွန်တော့်အမှုက ဘယ်လောက်တောင် ကြီးတာလဲ။ ပြောပြနိုင်ရင် ပြောပြပါ။ နောင်မှာ သတိထားနေထိုင်နိုင်အောင် သိချင်လို့ မေးတာပါဟု အစည်းအဝေးတက်ရောက်သူများရှေ့မှာပဲ၊ မေးလိုက်သည်။ ထိုအခါ ကာဒီနယ်ချားလ်စ်ဘိုက ဆရာတော်ဒေ့ါတန်၏မေးခွန်းကို တစ်ခွန်းတလေမှ မဖြေကြားပေးကြောင်း အစည်းအဝေးတက်ရောက်သူတစ်ဦးက ဂလိုရီယာသတင်းဂျာနယ်တိုက်သို့ပြောပြသည်။

ဆရာတော်ကြီး ဖရန်စစ်ဒေါ့တန်ကို တိုင်ကြားမှုနှင့်စပ်လျဉ်းပြီး နယ်ခံသီလရှင် မာရီယားရွယ်ကို မေးမြန်းရာတွင် သူမက၊ ဆရာတော်ကြီးဟာ ဒေသခံစီးပွားရေးလုပ်ငန်းရှင်များနှင့်တရုတ်ကုမ္ပဏီကြီးများ၏မြေယာသိမ်းပိုက်ခြင်းကိုတားဆီးပြီး ဒေသခံများပြည်သူများကိုကိုယ်ပိုင်အလုပ်နှင့်ကိုယ်ပိုင်ဝင်ငွေများ လုပ်ကိုင်စေရန်အတွက် အစိုးရထံနှင့်ကေအိုင်အေအဖွဲ့အစည်းထံမှ မြေဧကပေါင်း (၇၀၀၀) ကျော်ကို သာသနာတော်အတွက် လျှောက်ထားရရှိခြင်း၊ ဝယ်ယူခြင်းနှင့်ပိုင်ဆိုင်ခြင်းများ ပြုလုပ်ခဲ့ကြောင်း၊ ၎င်းမြေများပေါ်တွင် လယ်ယာမဲ့ကချင်ပြည်သူများဟာ လုပ်ကိုင်စားသောက်နေကြကြောင်း၊ တချို့မြေကွက်များပေါ်တွင်စစ်ပြေးဒုက္ခသည်များကို ပြန်ခေါပြီး ပြန်လည်နေရာချထားပေးခဲ့သည်ဟု ရှင်းပြသည်။ သို့သော် သူမက၊ အခုလိုတိုင်ကြားခံရမှုကို ကြည့်ရရင်၊ ဆရာတော်ဒေါ့တန်ဟာ သူ့ရဲ့ကောင်းသောရည်ရွယ်ချက်များကို မိမိရဲ့ရဟန်းတော်များအား ကြိုတင်တိုင်ပင်ဆွေးနွေးအသိပေးမှုများ မရှိခဲ့ခြင်းကြောင့်၊ ဆရာတော့်ကို ဖြုတ်ချလိုသော တချို့သောမြစ်ကြီးနားရဟန်းများက သူတို့ပုဂ္ဂိုလ်ရေးအကျိုးစီးပွားကို ပူးပေါင်းပြီး၊ ဆရာတော်ဟာ သာသနာ့ငွေများကို အလွဲသုံးစားလုပ်ပြီး ဧကထောင်ပေါင်းများစွာသော မြေကွက်များကို ပိုင်ဆိုင်ရောင်းဝယ်နေသည်ဟု ရဟန်းမင်းကြီးရုံးတော်သို့ တိုင်ကြားခြင်း ဖြစ်နိုင်သည်ဟု သုံးသပ်လေသည်။

တိုင်ကြားခံရခြင်းကို စုံစမ်းရန်အတွက် ရဟန်းမင်းကြီးရုံးတော်က ရန်ကုန်ကက်သလစ်ဂိုဏ်းချုပ်ဆရာတော်ကြီး ကာဒီနယ်ချားလ်စ်ဘိုကို တာဝန်ပေးခဲ့ပြီး ၂၀၂၀ ခုနှစ်၊ စက်တင်ဘာလတွင် ကာဒီနယ်ချားလ်စ်ဘိုသည် မြစ်ကြီးနားသို့ သွားရောက်ကာ တစ်ပတ်သာ စုံစမ်းခဲ့သည်ဟု ကြားသိရသည်။ ၎င်းစုံစမ်းမှုအပေါ် ဦးမြတ်စိုးလတ်က၊ မျှတတဲ့စုံစမ်းမှု မဟုတ်ဘူးလို့မြင်ပါတယ်။ တိုင်တဲ့သူတွေဖက်ကိုသာ မေးမြန်းစုံစမ်းပြီး၊ အတိုင်ခံရသူဖက်ကို ဏဏနန မစုံစမ်းခဲ့ဘူးလို့ သိရတယ်။ မျှတသောစုံစမ်းမှုသာ ဖြစ်ခဲ့မယ်ဆိုရင် ဆရာတော်ကြီးဒေါ့တန်ဟာ အခုလိုခံစားစရာ အကြောင်းမရှိဘူးလေဟု ဖြေကြားသည်။

ဆရာတော်ဖရန်စစ်ဒေါ့တန်က တချို့မြေကွက်တွေကို မိမိနာမည်နဲ့ မှတ်ပုံတင်ထားတာတွေ ရှိသလို တချို့မြေများကိုလည်း တခြားရဟန်းတွေရဲ့နာမည်နဲ့ မှတ်ပုံတင်ထားတာလည်း ရှိပါတယ်။ အရေးကြီးတာက ဒီမြေတွေကို တခြားလူတွေက လွယ်လွယ်ကူကူခိုးရောင်းတာမျိုးတွေ မလုပ်နိုင်အောင်ဆိုပြီး ကက်သလစ်သာသနာတော်အတွက် ရည်စူးပြီး လုပ်ဆောင်ခဲ့ခြင်းသာ ဖြစ်သည်ဟု ခုခံပြောဆိုသည်ဟု ကြားသိရသည်။ ဒီလိုရည်ရွယ်ချက်တွေနဲ့လုပ်ဆောင်ခဲ့တဲ့အပေါ်မှာ ရဟန်းမင်းကြီးရုံးက မိမိအား ဦးစွာဖြေရှင်းခွင့် မပြုဘဲ မိမိကိုတိုင်ကြားသူများဖက်ကသာ တဖက်သတ်နားထောင်ခဲ့သည်ဟု ဝေဖန်ပြောဆိုလိုက်သည်။

ကာဒီနယ်ချားလ်စ်ဘိုက မြစ်ကြီးနားဂိုဏ်းအုပ်သာသနာ၏တာဝန်ခံဆရာတော်ဖြစ်လာသောအခါ၊ သာသနာ့မြေများကို စုံစမ်းစစ်ဆေးထိန်းသိမ်းကော်မတီတစ်ခုကို ဖွဲ့စည်းပြီး ၎င်းကော်မတီက စုံစမ်းစစ်ဆေးခဲ့သည်ဟု ကော်မတီဝင်တစ်ဦးက ပြောပြသည်။ သူက၊ ဆရာတော်ဖရန်စစ်ဒေါ့တန်ကို စွပ်စွဲတဲ့မြေတွေနဲ့ငွေတွေကို ကော်မတီက စစ်ဆေးတဲ့အခါမှာ၊ ဆရာတော်ဖရန်စစ်ဒေါ့တန်ဖက်မှ အလွဲသုံးစားလုပ်ထားတာတွေကို ဘာမှမတွေ့ရဘူး၊ ငွေစာရင်းနှင့်မြေစာရင်းတွေလည်း သေချာထိန်းသိမ်းထားတာကို တွေ့ရသည်ဟု ဂလိုရီယာသတင်းဂျာနယ်သို့ ပြောပြသည်။

ဒေသခံကက်သလစ်ဘာသာဝင်တစ် ဦးက မြစ်ကြီးနားကက်သလစ်သာသနာမှာက ရဟန်းတွေရဲ့မနာလိုဝန်တိုမှုတွေဟာ ပြင်းထန်လွန်းလို့ ရယ်စရာကောင်းကြောင်း၊ သို့သော် ကာဒီနယ်ချားလ်စ်ဘိုလက်ထက်မှာတော့ ပိုမိုကောင်းမွန်တဲ့ သာသနာအုပ်ချုပ်မှုကို မျှော်လင့်မိပါတယ်ဟု ဖြေကြားပေးသည်။

ဖားကန့်မြို့ပေါ်ရှိ ဆလိုင်းဘွေအုပ်က၊ ကချင်ကက်သလစ်ရဟန်းထဲမှာလည်း လူမျိုးရေးက ပြင်းထန်တယ်လေ။ ဒါကြောင့် လူမျိုးကြီးအုပ်စုက လူမျိုးငယ်အုပ်စုလို ဆရာတော်ကြီးဖရန်စစ်ဒေါ့တန်ကို ဖြုတ်ချနိုင်တာပေါ့။ သာသနာထဲမှာတော့ လူမျိုးရေး မပါလာရင် သိပ်ကောင်းမှာပေါ့ဟု မီးမောင်းထိုးပြသည်။

ဒေသခံသီလရှင်တစ်ပါးက၊ ဆရာတော်ဒေါ့တန်က ရိုးတယ်၊ ဘုရားတရားရှိတယ်။ ဒါပေမယ့်စီမံခန့်ခွဲမှုလည်း ညံ့တယ်လို့ပြောရမှာပေါ့။ ဘုရားတရားရှိပြီး ရိုးသားခြင်းတွေက သူ့ကို မျက်ကန်းဖြစ်စေပြီးတော့ မိမိကိုအန်တုတဲ့သူတွေ၊ မိမိလုပ်သင့်လုပ်ထိုက်တဲ့အလုပ်တွေကို မမြင်နိုင် ဖြစ်သွားတယ်လို့မြင်ပါတယ်။ ဆရာတော်က တခြားသာသာနာတိုးတက်ရာတိုးတက်ကြောင်းမှာတော့ အားနည်းချက်တွေရှိတာတော့ မှန်ပါတယ်။ ဆရာတော်ဆိုတာ မြေယာတွေပဲ စိတ်ဝင်စားလို့ မရဘူးလေ။ ဒီထက်အရေးကြီးတဲ့ သာသနာတိုးတက်ရေးဆိုင်ရာလုပ်ငန်းများကိုလည်း အာရုံစိုက်ဖို့ လိုပါတယ်။ ဒါပေမယ့် မြေကိစမှာတော့ အပြင်မှာ စွပ်စွဲသလိုတော့ မဟုတ်ဘူးဆိုတာတော့ ပြောရဲပါတယ်ဟု ဂလိုရီယာသတင်းဂျာနယ်တိုက်သို့ ဖြေကြားပေးသည်။

မှန်ပါသည်။ ကက်သလစ်သာသနာတော်သည် တရားမျှတမှုကိုဟောပြောသော်လည်း တရားမျှတမှုကို လက်တွေ့မကျင့်သော ကက်သလစ်ဆရာတော်နဲ့ရဟန်းတော်များ များစွာ ရှိနေကြပါသေးသည်။ တချို့သော ကက်သလစ်ဆရာတော်ကြီးများ၊ ရဟန်းတော်များ၊ သီလရှင်များနှင့်သာမန်ဘာသာဝင်တို့သည် လူသားများ၊ ကက်သလစ်သာသနာတော်နှင့်ဘုရားသခင်တို့ကို အနစ်နာခံကာ သက်ဆုံးတိုင် အစေခံခဲ့ကြသော်လည်း နောက်ဆုံးတွင်မူ ကက်သလစ်သာသနာတော်ရှိလူကြီးများ၏ စွန့်ပစ်လျစ်လျူရှုခြင်းကိုခံစားရင်း ဘဝကို အကျည်းတန်စွာဖြင့် နိဂုံးချုပ်ခဲ့ကြလေသည်။

ဆရာတော်ဒေါ့တန်သည် မိမိသိချင်သော အဖြေကို ဗာတီကန်နန်းတော်မှ ကြားရတော့မည်မဟုတ်ကြောင်းကို သိရှိလာပြီးနောက် ယခုအခါ သူသည် နာခံခြင်းအပြည့်ဖြင့် ရဟန်းမင်းကြီး၏ဆုံးဖြတ်ချက်အတိုင်း အငြိမ်းစားယူလိုက်ပြီးနောက် မိမိတတ်နိုင်သော ဘာသာရေးလုပ်ငန်းများကို ဆက်လက်လုပ်ဆောင်နေလေသည်။

(၇) လကြာ အချိန်ယူပြီးနောက် ယခုအခါတွင်မူ မြစ်ကြီးနားဂိုဏ်းအုပ်သာသနာ၏တာဝန်ခံဆရာတော်ဖြစ် တော်မူသော ကာဒီနယ်ချားလ်စ်ဘိုသည်လည်း ဆရာတော်ဒေါ့တန်ကို ဆက်ခံမည့် ဆရာတော်တစ်ပါးကို ရွေးကောက်တင်မြောက်နိုင်ရေးအတွက် မြစ်ကြီးနားကက်သလစ်သာသနာထဲမှ ရဟန်းများအကြားတွင် ဆရာတော်ဖြစ်ထိုက်သော ကိုယ်စားလှယ်လောင်းမဲများကို စတင်ကောက်ယူလုပ်ဆောင်နေပြီဖြစ်ပါသည်။

ဆရာတော်ကြီးဒေါ့တန်သည် မြစ်ကြီးနားကက်သလစ်သာသနာမှ ရဟန်းတချို့နှင့်ဗာတီကန်အတွက် အညတရလူ (အသုံးမကျတဲ့သူ) ဖြစ်နေဌားသော်လည်း ထောင်နဲ့ချီသော ကချင်ကက်သလစ်ဘာသာဝင်များအတွက်ကမူ၊ သူရဲကောင်းအဖြစ် အမှတ်ရနေကြအုံးမည်မှာ သေချာသည်။

ဆရာတော်ကြီးဒေါ့တန်သည် ၁၉၄၉၊ ဒီဇင်ဘာ ၁၉ ရက်၊ ဖားကန့်စီရင်စုနယ်၊ ဘွန်ဒွမ်ကျးရွာတွင်မွေးဖွားခဲ့သည်။ သူသည် ၁၉၇၉ ခုနှစ်မတ်လ ၂၅ ရက်တွင် ကက်သလစ်ရဟန်းသိကာကို ဆရာတော်ကြီးပေါလ်ဇိန်ထုန်းဂရောင်လက်တော်မှ ရရှိတော်မူခဲ့သည်။ထို့နောက်သူသည် နန်လင်းရဟန်းစီရင်စုတွင် ကျောင်းထိုင်ဘုန်းတော်ကြီးအဖြစ် ၁၄ နှစ်တာ၀ န်ထမ်းဆောင်ခဲ့သည်။ ၁၉၉၃ မှ ၂၀၀၂ အထိသူသည် ဖားကန့်စီရင်စု၏ကျောင်းထိုင်ဘုန်းတော်ကြီးဖြစ်သည်။ ၂၀၀၂ ခုနှစ်၊ ဧပြီလ ၁၁ ရက်နေ့တွင်သူသည် ဆရာတော်သိကာကိုလက်ခံရရှိခဲ့ပြီးမြစ်ကြီးနားရှိ၏လက်ထောက်ဆရာတော်အဖြစ်အမှုဆောင်ခဲ့သည်။ သူသည် ၂၀၀၃ ခုနှစ်၊ ဇွန်လ ၁၁ ရက်တွင်မြစ်ကြီးနားကက်သလစ်သာသနာတော်၏ တာဝန်ခံဆရာတော်အဖြစ်ခန့်အပ်ခြင်းခံရသည်။ ၂၀၀၄၊ ဒီဇင်ဘာ ၃ ရက်တွင်ရဟန်းမင်းဂျွန်ပေါလ် ၂ က သူ့ကိုမြစ်ကြီးနားကက်သလစ်ဂိုဏ်းအုပ်သာသနာ၏ သာသနာပိုင်ဂိုဏ်းအုဆရာတော်အဖြစ် ခန့်အပ်ခဲ့သည်။

ယခုသီတင်းဆောင်းပါးကို ရေးသားသော ဂျိုးဇက်ကုန်ဇမှုန်းသည် ဆရာတော်ကြီးဖရန်စစ်ဒေါ့တန်နှင့်ပတ်သက်သော စွပ်စွဲသောမြေကိစများကို (၅) လကြာအတွင်း မြစ်ကြီးနားနယ်မှ ရဟန်းတချို့၊ သီလရှင်တချို့၊ အသင်းအုပ်ဆရာဆရာများနှင့်ဘာသာဝင်များကို စုံစမ်းမေးမြန်းပြီးမှ ယခုဆောင်းပါးကို တင်ဆက်ပေးလိုက်ခြင်း ဖြစ်ပါသည်။

ပုဂ္ဂိုလ်သုံးပါးတစ်ဆူဘုရားက ကြီးမားတဲ့နားလည်မှုတစ်ခုကို ကျွန်ုပ်တို့ကို သင်ပြနေပါတယ်

ရနကြုနကြကသြလဈဂိုဏြးခွုပသြာသနာပိုငြ ဆရာတောကြှီး ကာဒီနယခြွားလဈြဘိုဟောကှားသော သန့ရြှငြးသော ပုဂျဂိုလသြုံးပါးတဈဆူဘုရားပှဲ ဩဝါဒ