ဒေါ်အောင်ဆန်းစုကြည် ထောင်ဝင်စာ ပို့ခွင့်ရ

ပြီးခဲ့တဲ့ရက်ပိုင်းကပဲ နေပြည်တော် အကျဉ်းထောင်ကို ပြောင်းရွှေ့ခံခဲ့ရတဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ဒီကနေ့ ပထမဆုံးအကြိမ် အကျဉ်းထောင်ထဲ ထောင်ဝင်စာ ပေးခွင့်ရတယ်လို့ နီးစပ်တဲ့ အသိုင်းအဝိုင်းက ပြောပါတယ်။

အကျဉ်းထောင် စည်းမျဉ်းတွေအတိုင်း လိုက်နာကျင့်သုံးခွင့်နဲ့ နေထိုင်ခွင့် ပြုထားပြီး အကျဉ်းဦးစီးဘက်က သီးသန့် စီစဉ်ပေးထားတဲ့ ဝန်ထမ်း ၆ ယောက်ကို ဒေါ်အောင်ဆန်းစုကြည် ဘေးနားမှာ ထားပေးတယ်လို့လည်း သိရပါတယ်။ စစ်ကောင်စီဘက်ကတော့ နေပြည်တော် အကျဉ်းထောင်ထဲကို ပြောင်းရွှေ့လိုက်တယ်ဆိုတာကိုသာ အတည်ပြုပြီး တခြားကိစ္စ အသေးစိတ် ပြောဆိုခြင်း မရှိသေးပါဘူး။

ဒီကနေ့ နေပြည်တော်အကျဉ်းထောင်မှာ ဒေါ်အောင်ဆန်းစုကြည်၊ သမ္မတဦးဝင်းမြင့် နဲ့ NLD အစိုးရလက်ထက် အစိုးရအဖွဲ့ပြည်ထောင်စုဝန်ကြီး ဦးမင်းသူတို့ကို စွဲဆိုထားတဲ့ ၂၀၂၀ ရွေးကောက်ပွဲမှာ မဲမသမာမှု ဖြစ်အောင် လုပ်တယ်ဆိုတဲ့ အမှုကို ဆက်လက် စစ်ဆေးကြားနာခဲ့ပါတယ်။

ရုံးချိန်းမှာ ဒေါ်အောင်ဆန်းစုကြည်ကို ကျန်းကျန်းမာမာ တွေ့ရပြီး သမ္မတ ဦးဝင်းမြင့်ကတော့ စဖမ်းချိန် ကတည်းကထားတဲ့အတိုင်း နေအိမ်အကျယ်ချုပ်မှာ နေပြီး လာရောက် ကြားနာတယ်လို့ သိရပါတယ်။

ဒီနေ့ရုံးချိန်းမှာ ပြန်ခေါ်သက်သေအဖြစ် ပြည်ထောင်စုရွေးကောက်ပွဲကော်မရှင် ညွှန်ကြားရေးမှူးချုပ် ဦးရဲရင့်လွင်ကို စစ်ဆေးခဲ့ပါတယ်။ ဒီကနေ့ စစ်ဆေးတဲ့အမှု အပါအဝင် ဒေါ်အောင်ဆန်းစုကြည်အပေါ် စွဲဆိုထားတဲ့ အမှုတွေနဲ့ပတ်သက်လို့ တရားရုံး ကြားနာမှုတွေကို သတင်းထောက်တွေ လာရောက်ခွင့် မရှိသလို ဒေါ်အောင်ဆန်းစုကြည်ရဲ့ ရှေ့နေတွေကိုလည်း အမှုနဲ့ပတ်သက်ပြီး သတင်းမီဒီယာတွေကို မပြောဖို့ စစ်ကောင်စီက ပိတ်ပင်ထားပါတယ်။

လတ်တလောအချိန်ထိတော့ ဒေါ်အောင်ဆန်းစုကြည်ကို စွပ်စွဲထားတဲ့ အမှုပေါင်း ၁၈ ခုထက်မနည်းရှိနေပြီး ဒီထဲက ၆ မှုအတွက် ထောင်ဒဏ် ၁၁ နှစ် ပြစ်ဒဏ် ချမှတ်ထားပြီး ဖြစ်ပါတယ်။

#ဒေါ်အောင်ဆန်းစုကြည် #ဦးရဲရင့်လွင် #သမ္မတဦးဝင်းမြင့် #နေပြည်တော်အကျဉ်းထောင် #အဂတိလိုက်စားမှု #ဗွီအိုအေ

ဒေါ်အောင်ဆန်းစုကြည်နဲ့ ဦးဝင်းမြင့် အမှုကိစ္စတွေ ထုတ်မပြောဖို့ ရှေ့နေ ဦးကြည်ဝင်း တားမြစ်ခံရ

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ သမ္မတဦးဝင်းမြင့်တို့ရဲ့ အမှုနဲ့ပတ်သက်တဲ့ အကြောင်း တွေကို သတင်းမီဒီယာတွေနဲ့ ပြည်တွင်း၊ ပြည်ပ အဖွဲ့အစည်း တွေကို ထုတ်ဖော်မပြောဖို့ ရှေ့နေ ဦးကြည်ဝင်း ကို ဒီနေ့ အောက်တိုဘာလ ၂၃ ရက်နေ့မှာ စစ်ကောင်စီက ပုဒ်မ ၁၄၄ ထုတ်ပြန် ပြီး တားမြစ်ခံလိုက်ရပါတယ်။

အဲဒီ အမှုတွေကို လိုက်ပါဆောင်ရွက်ပေးနေတဲ့ ရှေ့နေတွေဖြစ်ကြတဲ့ ဦးခင်မောင်ဇော်၊ ဒေါ်စန်းမာလာ ညွန့်၊ ဒေါ်မင်းမင်းစိုးနဲ့ ဦးသဲမောင်မောင်တို့ကို စစ်ကောင်စီက အမှုအကြောင်း ထုတ်ဖော်ပြောဆိုခွင့် ပိတ်ပင်ထားပြီး ဖြစ်တဲ့အတွက် အခုက အဖွဲ့ထဲက နောက်ဆုံးကျန်နေတဲ့ ရှေ့နေဦးကြည်ဝင်းကို ထပ်မံ ပိတ်ပင်တားမြစ် ခံလိုက်ရတာပါ။

ရှေ့နေဦးကြည်ဝင်းက လာမယ့် တနင်္လာနေ့မှာ ဒေါ်အောင်ဆန်းစုကြည်ရဲ့ အမှုတွေကို လိုက်ဖို့တွက် နေပြည်တော်ကို ရောက်နေပေမယ့်လည်း သူ့ကိုပိတ်ပင်တားမြစ်တဲ့ ပုဒ်မ ၁၄၄ ထုတ်လိုက်တဲ့ စာကို ရန်ကုန်မြို့ ၃၅ လမ်း ရှေ့နေဦးကြည်ဝင်းရဲ့ ရုံးခန်းကို လာပို့ခဲ့တာလို့ ဦးကြည်ဝင်းနဲ့နီးစပ်တဲ့ ရှေ့နေ အသိုင်း အဝိုင်းက စုံစမ်းသိရပါတယ်။

လာမယ့် အောက်တိုဘာ ၂၆ ရက် အင်္ဂါနေ့မှာ အဲဒီအမှု အတွက်ပဲ ဒေါ်အောင်ဆန်းစုကြည်က ရုံးတော်မှာ လူကိုယ်တိုင် ထွက်ဆိုဖို့ရှိနေပြီး အဲဒီ ရုံးချိန်းရက် မရောက်မီ သုံးရက်အလို ဒီနေ့ ရှေ့နေ ဦးကြည်ဝင်း ထပ်မံပိတ်ပင်ခံရတာလည်း ဖြစ်ပါတယ်။

ဒေါ်အောင်ဆန်းစုကြည်၊ ဦးဝင်းမြင့်နဲ့ ဒေါက်တာမျိုးအောင်တို့ သုံးဦးကို စွဲထားတဲ့ ပုဒ်မ ၅၀၅ (ခ) အမှုအတွက် သမ္မတဦးဝင်းမြင့် ကိုယ်တိုင်ထွက်ဆိုခဲ့စဉ်က စစ်တပ်က အာဏာသိမ်းတဲ့ ဖေဖော်ဝါရီလ ၁ ရက်နေ့မှာ သူ့ကို စစ်တပ်အရာရှိကြီးတွေက ဖိအားပေး နုတ်ထွက်ခိုင်းတဲ့အကြောင်း ရုံးတော်မှာ ထွက်ဆိုခဲ့ပါတယ်။

အဲဒီအကြောင်းကို ရှေ့နေတွေက ပြည်တွင်း၊ ပြည်ပမီဒီယာတွေကို သတင်းထုတ်ပြန် ပေးပြီးတဲ့နောက် နေပြည်တော်က ရှေ့နေသုံးဦး မီဒီယာတွေကို ထုတ်ပြန်ပြောဆိုဖို့ ပိတ်ပင်ခံခဲ့ရပါတယ်။

ရှေ့နေတွေကို မီဒီယာတွေဆီဖြေဖို့ ကန့်သတ်ထားတာကြောင့် နောက်ပိုင်း တရားရုံးချိန်း တွေမှာ ဒေါ်အောင်ဆန်းစုကြည်ရဲ့ တရားရုံးတော်မှာ ထွက်ဆိုချက်တွေကို အများပြည်သူ သိရှိခွင့် ရှိ၊ မရှိကတော့ မသိရသေးပါဘူး။