ဆယ်ကျော်သက်ရွယ်ကလေးငယ်များအား လိင်ပိုင်ဆိုင်ရာစော်ကားမှုရှိလျှင် တရားရုံးသို့တိုင်ကြပါ။

၂၀၁၈ ခုနှစ်သည် တကမ္ဘာလုံးရှိကက်သလစ်အသင်းတော်ထဲတွင် ကံဆိုးမိုးမှောင်ကျသောနှစ်ဟုဆိုရပေ မည်။ အဘယ်ကြောင့်ဆိုသော် အမေရိကန်၊ ချီလီ၊ သြစတြေးလျား၊ အိုင်ယာလန်စသောနိုင်ငံများ၌ လွန်ခဲ့သော ၁၉၅၀ ခုနှစ်ဝန်းကျင်မှစတင်က ဖြစ်ပွားပြီးဖုန်းကွယ်ခဲ့ကြသော ကက်သလစ်ရဟန်းတချို့၏ ကလေးငယ်များအပေါ် လိင်ပိုင်းဆိုင်ရာစော်ကားမှုများကို အစော်ကားခံလူတစ်ချို့က စတင်ဖော်ထုတ်ခြင်းကို လှုပ်ရှားပြုလုပ်လာခဲ့ကြလေ သည်။ ထိုကဲ့သို့သော ရဟန်းတစ်ချို့၏ကလေးငယ်များအပေါ် လိင်ပိုင်းဆိုင်ရာစော်ကားမှုများကို ၎င်းရဟန်းတို့၏ ဆရာတော်များက အရေးယူမှု မပြုခဲ့ကြဘဲ ငွေကြေးဖြင့်လည်းကောင်း၊ တာဝန်ခံမှုကင်းမဲ့ခြင်းဖြင့်လည်းကောင်း တိုးတိုးတိတ်တိတ် ဖုန်းကွယ်ပေးခဲ့ကြသည်ဟု သိရှိရပါသည်။

အမှန်စင်စစ်၊ အထက်ဖော်ပြပါနိုင်ငံများတွင် ရှိနေကြသော ကက်သလစ်အသင်းတော်ကြီးသည် နိုင်ငံအလိုက်၊ သက်ဆိုင်ရာကက်သလစ်ဆရာတော်ကြီးများအဖွ့ဲချုပ်က မူဝါဒမျိုးစုံ၊ စည်းကမ်းဥပဒေမျိုးစုံဖြင့် မိမိတို့ နိုင်ငံ၏အသင်းတော်ကို စီမံအုပ်ချုပ်နေကြသော နိုင်ငံများ၊ ဆရာတော်များ ဖြစ်ကြသည်။ သို့သော် အမှန်တကယ် ၎င်းမူဝါဒ၊ စည်းမျဉ်းဥပဒေကို ချိုးဖောက်သော ဆရာတော်နှင့်ရဟန်းတော်များ ပေါ်ပေါက်လာကြသောအခါ၊ အာဏာရှိသော ဆရာတော်များသည် မိမိတို့၏ရဟန်းများကိုသာ ကာကွယ်ပေးကြပြီး ရဟန်းများ၏လိင်ပိုင်းဆိုင်ရာ စော်ကားခံကြရသော ဘာသာတူကလေးငယ်များအတွက် တရားမျှတသော ကာကွယ်ပေးမှုကို မပြုလုပ်ခဲ့ကြသည့် အပြင် ဖုန်းကွယ်ပေးခဲ့ကြသည်ဟု ပေါ်ထွက်လာပါသည်။

ထို့ကြောင့် ရဟန်းမင်းကြီးက ““ဘုရားတရားအလုပ်ကို လုပ်ပြီး အလုံခြုံဆုံးဟုထင်ရသော ကက်သလစ် အသင်းတော်ထဲက ဆရာတော်များနှင့်ရဟန်းတော်များသည် မိမိတို့ ၏သိုးများကို ကာကွယ်စောင့်ရှောက်ခြင်းထက် မိမိတို့၏သိုးများကို ဖျက်ဆီးစော်ကားနေကြသောယဉ်ကျေးမှုကို အမြစ်ပျက် တွန်းလှန်ရမည်ဟု အိုင်ယာလန်နိုင်ငံ၌ မိန့်ကြားခဲ့လေသည်။
မြန်မာနိုင်ငံကက်သလစ်ဆရာတော်ကြီးများအဖွဲ့ချုပ်နှင့်မြန်မာ နိုင်ငံရှိကက်သလစ် ဆရာတော်ပိုင်သာသနာ များတွင် ကာနွန်ဥပဒေမှတစ်ပါး၊ မူဝါဒများ၊ စည်းမျဉ်းဥပဒေများလည်း အများပြည်သူသိအောင် ထုတ်ပြန်ထားခြင်း မရှိကြသေးပေ။ ထိုသို့မည်သည့်မူဝါဒ၊ စည်းမျဉ်းဥပဒေမှ မရှိသေးပါက မြန်မြန်ရေးဆွဲရန် အရေးတကြီးလိုအပ်ပြီ ဖြစ်ပါသည်။ အဘယ်ကြောင့်ဆိုသော်၊ မြန်မာနိုင်ငံကက်သလစ် ဆရာတော်ကြီးများအဖွဲ့ချုပ်နှင့်မြန်မာ နိုင်ငံရှိကက်သလစ် ဆရာတော်များသည် မိမိတို့ပိုင်သောသာသနာများတွင် ကလေးသူငယ်များအပေါ် ရဟန်းကိုရင်များက လိင်ပိုင်းဆိုင်ရာစော်ကားခြင်းများ ရှိခဲ့သော် ဆရာတော်များသည် မိမိတို့၏ရဟန်းကိုရင်များကိုသာ ကာကွယ်ပေးကြပြီး အစော်ကားခံရသော ကလေးငယ်များဖက်မှ ရပ်တည်လုပ်ဆောင်သည့်လုပ်ရပ်များ မရှိခဲ့သည်ကို ကျွန်ုပ်ကိုယ်တိုင် သိရှိခဲ့ရဖူးသည်။

ထို့ကြောင့် မြန်မာနိုင်ငံကက်သလစ်ဆရာတော်ကြီးများအဖွဲ့ချုပ်နှင့်မြန်မာနိုင်ငံရှိကက်သလစ် ဆရာတော် များအနေဖြင့်၊ သာသနာလုပ်ငန်းများကိုလုပ်နေသည့်အကြားတွင်ပင် အထက်ဖော်ပြသော ပြစ်မှုဆိုင်ရာများ မဖြစ်ပေါ်လာရန်၊ ဖြစ်ပေါ်လာလျှင် မည်သို့ ဆောင်ရွက်မည်ဟူသော မူဝါဒများနှင့်စည်းမျဉ်းဥပဒေများကို ရေးဆွဲပြီး မြန်မာနိုင်ငံရှိကက်သလစ်ခရစ်ယာန်ဘာသာဝင်များကို သိရှိစေရန် အချိန်ကျရောက်လေပြီ။ တဖက်တွင်လည်း မြန်မာနိုင်ငံအတွင်းရှိကက်သလစ်ခရစ်ယာန်ဘာသာဝင်များအနေဖြင့် မိမိတို့၏ကလေးငယ်များအား ဘော်ဒါဆောင်၊ ရဟန်းဖြစ်သင်ကျောင်း၊ သီလရှင်ကျောင်းများ နှင့်ဘုန်းကြီးကျောင်း များတွင် ဆရာတော်ရဟန်းသီလရှင်ကိုရင်များက လိင်ပိုင်းဆိုင်ရာ စော်ကားမှုများ ရှိမရှိကို မိမိတို့၏ သားသမီးများ အား မေးမြန်းကြပြီး စော်ကားမှုများတွေ့ရှိပါက တရားရုံးသို့ အမှုဖွင့်တိုင်ကြားကြပါရန် တိုက်တွန်းနှိုး ဆော်အပ်ပါ သည်။ အယ်ဒီတာချုပ်

1016  Views