မြန်မာနိုင်ငံရှိခရစ်ယာန်ညီအစ်ကိုဂိုဏ်းကွဲများက ကက်သလစ်ခရစ်ယာန်ဘာသာဝင်များ၏ ကိုယ်တော်မြတ်မုန့်တော်နှင့်အသွေးတော်စပျစ်ရည်တို့ကို သုံးဆောင်ခွင့်ပြုရန် တောင်းဆို

ဝေါဟာရတူညီသော မြန်မာဘာသာကျမ်းစာအုပ်ကို ထုတ်ဝေနိုင်ရေးအတွက် ဆလိုင်းဂျိုးဇက်ကုန်ဇမှုန်း (ခ) ဝင်းလှိုင်ဦးက အဆိုပြုတင်ပြ

 

မြန်မာနိုင်ငံကက်သလစ်ဆရာတော်ကြီးများအဖွဲ့ချုပ်က အတူတကွခရီးပြုခြင်းဟု အနက်ရသော ဓမညီလာခံနှင့်စပ်လျဉ်းပြီး မြန်မာနိုင်ငံရှိခရစ်ယာန်ညီအစ်ကိုဂိုဏ်းကွဲများအား ရှင်းပြဖိတ်ခေါ်ခြင်း ဆွေးနွေးပွဲကို နိုဝင်ဘာလ (၃၀) ရက်နေ့က မြန်မာနိုင်ငံကက်သလစ်ဆရာတော်ကြီးများအဖွဲ့ချုပ်ရုံးတွင် ကျင်းပပြုလုပ်ခဲ့ပါသည်။

 

 

၎င်းဆွေးနွေးပွဲကို မြန်မာနိုင်ငံကက်သလစ်ဆရာတော်ကြီးများအဖွဲ့ချုပ်၏ အတွင်းရေးမှူး၊ ရန်ကုန်ကက်သလစ်ဂိုဏ်းချုပ်သာသနာ၏လက်ထောက်ဆရာတောကြီး ဂျွန်စောယောဟန်က ဦးဆောင်ကျင်းပသွားခြင်းဖြစ်ပြီး ကက်သလစ်ရဟန်း (၄) ပါး၊ သီလရှင်တစ်ပါး၊ ကိုရင်တစ်ပါး၊ သာမန်ဘာသာဝင် (၃) ဦးနှင့် မြန်မာနိုင်ငံရှိခရစ်ယာန်ညီအစ်ကိုဂိုဏ်းကွဲများမှ ခေါင်းဆောင်ပေါင်း (၁၉) ပါး တက်ရောက်ဆွေးနွေးပါဝင်ကြပါသည်။

၎င်းဆွေးနွေးပွဲတွင် မြန်မာနိုင်ငံကက်သလစ်ဆရာတော်ကြီးများအဖွဲ့ချုပ်၏ အတွင်းရေးမှူး၊ ရန်ကုန်ကက်သလစ်ဂိုဏ်းချုပ်သာသနာ၏လက်ထောက်ဆရာတောကြီး ဂျွန်စောယောဟန်က၊ ၂၀၂၁ ခုနှစ်မှ ၂၀၂၃ ခုနှစ်အထိ ကက်သလစ်သာသနာတစ်ခုလုံး ကျင်းပပြုလုပ်နေသော အတူတကွခရီးပြုခြင်းဓမညီလာခံတွင် ခရစ်ယာန်ညီအစ်ကိုဂိုဏ်းကွဲများလည်း ကက်သလစ်သာသနာတော်နှင့် မည်ကဲ့သို့ တစ်လုံးတစ်ဝတည်းရှိနိုင်ခြင်း၊ ပူးပေါင်းပါဝင်နိုင်ခြင်းနှင့်သာသနာအမှုတော်တို့ကို ထမ်းဆောင်နိုင်ခြင်းတို့ကို ဆွေးနွေးဖလှယ်ကြရန် ရဟန်းမင်းကြီးဖရန်စစ်အရှင်သူမြတ်က လမ်းညွှန်ပေးထားကြောင်းကို အကျယ်တဝင်းရှင်းပြတော်မူသည်။

ကက်သလစ်ဘုန်းတော်ကြီး ဆိုင်မွန်တင်မောင်၊ ဂျွန်ပေါလ်ဇော်မင်းအေး၊ ပေါလီနူးစ်မြကြိုင်နှင့် ဟိုင်ဂျီးနူးစ်မြင့်စိုးတို့က အတူတကွခရီးပြုခြင်းဓမညီလာခံအကြောင်းကို မြန်မာနိုင်ငံရှိခရစ်ယာန်ညီအစ်ကိုဂိုဏ်းကွဲများအား အားပါးတရ ရှင်းပြတော်မူကြသည်။

 

 

ထိုနောက် မြန်မာနိုင်ငံရှိခရစ်ယာန်ညီအစ်ကိုဂိုဏ်းကွဲများက ရဟန်းမင်းကြီးဖရန်စစ်အရှင်သူမြတ်က လမ်းညွှန်ပေးထားသော အတူတကွခရီးပြုခြင်းဓမညီလာခံအပေါ် ကက်သလစ်သာသနာတော်နှင့် ပူးပေါင်းလုပ်ဆေင်ပါဝင်နိုင်မည့်နည်းလမ်းများ၊ အကြံပြုချက်များ၊ တောင်းဆိုချက်များကို ပွင့်ပွင့်လင်းလင်း ဆွေးနွေးတင်ပြကြပါသည်။

ဆွေးနွေးတင်ပြချက်များကမူ၊

(၁) မြန်မာနိုင်ငံရှိခရစ်ယာန်ညီအစ်ကိုဂိုဏ်းကွဲများအနေဖြင့် ကက်သလစ်သာသနာတော်နှင့် ပူးပေါင်းလုပ်ဆေင်ရန် အစဉ်သင့်ဖြစ်ပါကြောင်း၊
(၂) အတူတကွခရီးပြုခြင်းဓမညီလာခံအပေါ် ကြိုဆိုသကဲ့သို့ အတုယူစရာလည်း ဖြစ်ပါကြောင်း
(၃) ကက်သလစ်ခရစ်ယာန်ဘာသာဝင်များ၏ ကိုယ်တော်မြတ်မုန့်တော်နှင့်အသွေးတော်စပျစ်ရည်တို့ကို ခရစ်ယာန်ညီအစ်ကိုဂိုဏ်းကွဲများအား ပင့်ယူသုံးဆောင်ခွင့် ပြုပေးနိုင်ရေးအတွက် ရဟန်းမင်းကြီးထံသို့ တင်ပြပေးစေလိုကြောင်းဖြင့် တင်ပြဆွေးနွေးကြပါသည်။

ကက်သလစ်ခရစ်ယာန်ဘာသာဝင်ဖက်မှ ဆလိုင်းဂျိုးဇက်ကုန်ဇမှုန်း (ခ) ဝင်းလှိုင်ဦးက၊ မြန်မာဘာသာဖြင့်ထုတ်ဝေသော ကျမ်းစာအုပ်များတွင် (ကက်သလစ်ကျမ်းစာက မေရီ၊ ဂျိုးဇက်၊ ကာလ်ဝါရီဟု သုံးစွဲပြီး ခရစ်ယာန်ဂိုဏ်းကွဲကျမ်းစာများတွင်မူ မာရိ၊ ယောသပ်၊ ကာလ်ရနီ စသော ဝေါဟာရများ သုံးစွဲကွဲပြားနေခြင်းကို ရပ်ဆိုင်းပြီး) ကို တူညီသော အသုံးအနှုန်းများ သတ်မှတ်ပြီး ဝေါဟာရတူညီသော မြန်မာဘာသာကျမ်းစာအုပ်ကို ထုတ်ဝေနိုင်ရေးအတွက် အဆိုပြုတင်ပြခဲ့ပါသည်။

၎င်းဆွေးနွေးတင်ပြကြသည့်အပေါ်၊ မြန်မာနိုင်ငံကက်သလစ်ဆရာတော်ကြီးများအဖွဲ့ချုပ်၏ အတွင်းရေးမှူး၊ ရန်ကုန်ကက်သလစ်ဂိုဏ်းချုပ်သာသနာ၏လက်ထောက်ဆရာတော်ကြီး ဂျွန်စောယောဟန်က၊ ခရစ်ယာန်ညီအစ်ကိုဂိုဏ်းကွဲများ၏တင်ပြချက်များကို မြန်မာနိုင်ငံကက်သလစ်ဆရာတော်ကြီးများအဖွဲ့ချုပ်မှတဆင့် ဗာတီကန်အထိ တင်ပြပေးသွားမည်ဖြစ်ကြောင်း ပြန်လည်ဖြေကြားပေးတော်မူသည်။

463  Views