ကမ္ဘာကျန်းမာရေးအဖွဲ့ချုပ် WHO ညွှန်ကြားရေးမှူးချုပ် Tedros A Ghebreyesus က မျောက်ကျောက်ရောဂါကို ကမ္ဘာ့ကျန်းမာရေး အရေးပေါ်အခြေနေသတ်မှတ်
မျောက်ကျောက်ရောဂါ အလျှင်အမြန် ပျံပွားကူးစက်နေတာဟာ ကမ္ဘာလုံးဆိုင်ရာ အရေးပေါ် ကျန်းမာရေး အခြေအနေတရပ် ဖြစ်တယ်လို့ ကမ္ဘာကျန်းမာရေးအဖွဲ့ချုပ် WHO ညွှန်ကြားရေးမှူးချုပ် Tedros A Ghebreyesus က စနေနေ့က သတင်းမီဒီယာတွေကို ပြောပါတယ်။
“ ကမ္ဘာတလွှား မျောက်ကျောက်ရောဂါ ဖြစ်ပွါးနေတဲ့ အခြေနေကို ကြည့်ပြီး ဒါဟာ ကမ္ဘာလုံးဆိုင်ရာ ကျန်းမာရေးအရ အရေးပေါ်အခြေ ဖြစ်တယ်လို့ ကျနော်တို့ ဆုံးဖြတ်လိုက်ပါတယ်။”
ဒီလို နိုင်ငံတကာအတွက် စိုးရိမ်ရတဲ့ အများပြည်သူ အရေးပေါ်ကျန်းမာရေး အခြေအနေအတွက် နိုင်ငံအားလုံးက ပူးပေါင်းဆောင်ရွက်ပြီး ဝိုင်းဝန်း တုံပြန်ဆောင်ရွက်ကြဖို့အတွက် အချက်ပေးလိုက်တာဖြစ်တယ်လို့လည်း သူကပြောပါတယ်။ ဒါအပြင် တကမ္ဘာလုံး အတိုင်းအတာနဲ့ ကုသမှုတွေ၊ ကာကွယ်ဆေးတွေ ဝေမျှပေးကြဖို့ နဲ့ ရန်ပုံငွေတွေကိုလည်း ထည့်ဝင်ပေးကြဖို့ သူက တိုက်တွန်းလိုက်ပါတယ်။
အခုဆိုရင် နိုင်ငံနဲ့ ဒေသပေါင်း ၇၅ ခုမှာ ဒီရောဂါဖြစ်ပွါးသူဟာ ၁၆ ၀၀၀ ကျော်နေပြီဖြစ်ပြီး သေဆုံးရသူက ၅ ဦး ရှိနေပြီ လို့လည်း ပြောပါတယ်။ ပြီးခဲ့တဲ့ ဇွန်လကုန်ကဆိုရင် အဲဒီရောဂါဖြစ်ပွားသူပေါင်း ၃ ထောင်သာရှိပါတယ်။ အမေရိကန် ပြည်ထောင်စုမှာတော့ သောကြာနေ့က ပထမဦးဆုံး မျောက်ကျောက်ရောဂါဖြစ်ပွားတဲ့ ကလေး ၂ ဦးကို တွေ့ရှိထားပါတယ်။
အခု လက်ရှိမှတ်တမ်းတွေအရ ဥရောပ နဲ့ အမေရိကန် ပြည်ထောင်စုမှာဆိုရင် အဲဒီရောဂါဖြစ်ပွားကြသူ အားလုံးနီးပါးလိုလိုဟာ အမျိုးသားချင်း လိင်ဆက်ဆံကြသူတွေ ဖြစ်နေတာ တွေ့ရပါတယ်။
454 Views
