ဂျိုးဇက်ပညာရေးကျောင်းမှ ပထမဆုံးအကြိမ် စာပေးစာယူထူးချွန်အောင်လက်မှတ် ပေးအပ်ပွဲ ကျင်းပပြုလုပ်

ရန်ကုန်၊ ဒီဇင်ဘာ ၂၊ ၂၀၁၅

ဂျိုးဇက်ပညာရေးကျောင်းသည် ကျောင်း၏ပထမဆုံးအကြိမ်မြောက် ချီးမြင့်ပေးအပ်သော စာပေးစာယူပညာရေးဆိုင်ရာ ထူးချွန် အောင် လက်မှတ် ပေးအပ်ပွဲကို ဒီဇင်ဘာလ ၁ ရက်နေ့က စိန်အန်ထော်နီဘုရားကျောင်းဝင်းရှိ ရောင်ခြည်ဦးခန်းမဆောင်တွင် ကျင်းပပြုလုပ်ခဲ့ပါ သည်။

၎င်းအခမ်းအနားသို့ ရန်ကုန်ကက်သလစ်သာသနာပိုင် လက်ထောက်ဆရာတော်ကြီး ဂျွန်စောယောဟန်နှင့်အတူ၊ ဘုန်းဘုန်းမော ရစ်ညွန့်ဝေ၊ ဘုန်းဘုန်းဟိုက်ဂျီနူးစ်မြင့်စိုး၊ ဘုန်းဘုန်းသက်ကျော်၊ ဘုန်းဘုန်းစိန်ထွန်း၊ ဘုန်းဘုန်းဌေးလွင်၊ သီလရှင်ကိုရင်များ၊ စာပေစိတ်ဝင်စားကြသော ပရိသတ်များနှင့် ဂျိုးဇက်ပညာရေးကျောင်းမှ ဝန်ထမ်းများ စုစုပေါင်း (၁၂၅) ဦး တက်ရောက်ခဲ့ကြပါသည်။

ထို့နောက် ဂျိုးဇက်ပညာရေးကျောင်းမှ ကျောင်းအုပ်နှင့်ကျောင်းတည်ထောင်သူ ဂျိုးဇက်ကုန်ဇမှုန်းက ကျောင်းတည်ထောင်ရခြင်း အကြောင်းကို ဦးစွာပြောကြားရာတွင် ““ကက်သလစ်သာသနာတော်မှ လက်ခံသွန်သင်ထားသော ဘာသာရေးဆိုင်ရာပညာရပ်များ ကို သာမန်ကက်သလစ်ဘာသာဝင်များ လွယ်ကူစွာနှင့်ဈေးနှုန်းချိုသာစွာ သင်ယူနိုင်ရန်အတွက် ဝန်းကျင်တစ်ခု၊ နေရာတစ်ခုကို ဖန်တီးပေးရန် အချိန်အတော်ကြာ စဉ်းစားခဲ့ပြီးနောက် ၂၀၁၅ ခုနှစ် ဇန်နဝါရီလတွင် စတင်ခဲ့ပါကြောင်း၊ ထိုသို့စတင်ဖွင့်လှစ်ရာ တွင် ပထမအဆင့်အနေဖြင့် အဝေးသင်အောင်လက်မှတ်အဆင့်ပညာရေးအစီအစဉ်ကို စတင်ခဲ့ပြီး အောင်မြင်သော ကျောင်းသူ/သားများကို ဒီနေ့လက်မှတ်ချီးမြင့်ခြင်း ဖြစ်ပါကြောင်း၊ အများစုသော ကျောင်းသူ/သားများသည် ဝေးလံသောနေရပ် နှင့်အလုပ်အကိုင်များကြောင့် လာရောက်တက်ယူနိုင်ခြင်း မရှိကြသော်လည်း မိမိတို့အနေဖြင့် လွန်စွာပင် ဂုဏ်ယူမိကြကြောင်းကို တယ်လီဖုန်းမှတဆင့် ရင်ဖွင့်စကားများ လှမ်းပြောကြပါကြောင်း”” ဖြင့် ရှင်းပြပေးသည်။

ထို့နောက် လက်ထောက်ဆရာတော်ကြီး ဂျွန်စောယောဟန်နှင့် ကျောင်းအုပ်ဖြစ်သော ဂျိုးဇက်ကုန်ဇမှုန်းတို့က ထူးချွန်စွာအောင်မြင် ကြသော ကျောင်းသူနှစ်ဦးအား ““အဝေးသင်ထူးချွန်စွာအောင် မြင်ခြင်းလက်မှတ် (သာမန်ဘာသာဝင်များနှင့်ပတ်သက်သော ကာနွန် ဥပဒေပုဒ်မအချို့)”” ချီးမြင့်ပေးအပ်ကြပါသည်။ ချောက်မြို့မှ လာရောက်မတက်ယူနိုင်သော ကျောင်းသူအေမလီက ““အခုလို ကာဒီနယ် ချားလ်စ်ဘိုနဲ့ဆရာတော်ယောဟန်တို့ လက်မှတ်ပါတဲ့ အောင်လက်မှတ်ကို စာတိုက်ကနေ ရတော့ သိပ်ပျော်တာပဲ။ ဆက်ပြီးတော့ ဒီပလိုမာပညာရေးအစီအစဉ်ကို တက်အုံးမယ်”” ဟု တယ်လီဖုန်းဖြင့် သူမ၏ခံစားချက်ပီတိကို လှမ်းပြောပြသည်။

ဂျိုးဇက်ပညာရေးကျောင်းသည် ၂၀၁၆ ခုနှစ် မတ်လ (၁) ရက်နေ့မှစတင်ပြီး ဒီပလိုမာဘွဲ့ဆိုင်ရာ ဘာသာရေးပညာရပ်များကို ဆက်လက်ဖွင့်လှစ်သွားမည်ဖြစ်ကြောင်း သိရှိရပြီး ၎င်းဒီပလိုမာဘွဲ့အတွက် ပညာသင်ကြားသူများသည် စတင်လျှောက်လွှာ လက်ခံ နေပြီ ဖြစ်ကြောင်း၊ ပညာသင်ကြေး (၁) သိန်းကို မတတ်နိုင်သော ကျောင်းသူ/သားများကို ပညာသင်ထောက်ပံ့ကြေး ပေးရန် လည်း ကြေညာထားပြီ ဖြစ်ကြောင်း၊ ဇန်နဝါရီလ (၁၀) ရက်နေ့အထိ ၎င်းဒီပလိုမာဘွဲ့အစီအစဉ်ကို လျှောက်ထားသူပေါင်းမှာ (၃၀) ကျော်နေပြီ ဖြစ်သည်ဟု သတင်းရရှိထားပါသည်။ ၀၀၄ အောင်ကျော်ဦး

1552  Views