ချင်းပြည်နယ်၌ခရစ်ယာန်ဘုရားကျောင်းပေါင်း (၂၈၇၅) ခုရှိ ဖလမ်းမြို့နယ်သည် ခရစ်ယာန်ဘုရားကျောင်းပေါင်း (၄၆၉) ဖြင့် အများဆုံးဖြစ်
ရန်ကုန်၊ ဇူလိုင် ၂၁၊ ၂၀၁၈
ချင်းပြည်နယ်တွင် ခရစ်ယာန်ဘုရားကျောင်းစုစုပေါင်းသည် (၂၈၇၅) ခုရှိသည်ဟု ချင်းပြည်နယ် အထွေထွေအုပ်ချုပ်ရေးဦးစီးဌာန၏ သတင်းထုတ်ပြန်ချက်အရ သိရှိရသည်ဟု ၂၀၁၈ ခုနှစ် ဇူလိုင်လ (၁၄) ရက်နေ့ တွင် ထုတ်ဝေသော ချင်းပြည်နယ်အခြေစိုက်၊ ဖလမ်းဘာသာစကားဖြင့် ထုတ်ဝေသော Chinland Herald ၏ အပတ်စဉ်စာစောင်မှ သိရှိ ရပါသည်။ ချင်းပြည်နယ် အထွေထွေအုပ်ချုပ်ရေးဦးစီးဌာနက မိမိတို့ဌာနတို့ ဘုရားကျောင်းဟု အမည်စာရင်းတင်သွင်းပြီး မှတ်ပုံတင်ထားသော ဘုရားကျောင်းမှာ (၂၈၇၅) ခုရှိသည်ဟု ထုတ်ပြန်ခြင်း ဖြစ်သည်။
ချင်းပြည်နယ်သည် မြို့နယ်ပေါင်း (၉) ခုဖြင့် တည်ဆောက်ထားသောပြည်နယ်ဖြစ်သည်။ ၎င်းမြို့နယ်များမှာ၊ တွန်းဇံမြို့နယ်၊ တီးတိန်၊ ဖလမ်း၊ ဟားခါး၊ ထန်တလန်၊ မတူပီ၊ မင်းတပ်၊ ကန်ပလက်နှင့်ပလက်ဝမြို့နယ်တို့ ဖြစ်ကြ သည်။ ၎င်းမြို့နယ်များထဲမှ ဖလမ်းမြို့နယ်သည် ခရစ်ယာန်ဘုရားကျောင်း (၄၆၉) ခုဖြင့် အများဆုံးမြို့နယ်အဖြစ် ပထမဆုံးအဆင့်တွင် ရပ်တည်နေသည်။ ဒုတိယခရစ်ယာန်ဘုရားကျောင်း အများဆုံးသောမြို့မှာ ပလက်ဝမြို့နယ်၊ တတိယဒုတိယခရစ်ယာန်ဘုရားကျောင်း အများဆုံးသောမြို့မှာ တီးတိန်မြို့နယ်တို့ ဖြစ်ကြသည်၏ဟု သိရှိရပါသည်။
ကိုးမြို့နယ်အသီးသီးတွင် တည်ရှိသောဘုရားကျောင်းအရေအတွက်များမှာ ဖလမ်းမြို့နယ်တွင် (၄၆၉) ကျောင်း၊ ပလက်ဝမြို့နယ်တွင် (၄၁) ကျောင်း၊ တီးတိန်မြို့နယ်တွင် (၃၆၁) ကျောင်း၊ မတူပီမြို့နယ်တွင် (၃၂၁) ကျောင်း၊ ထန်တလန်မြို့နယ်တွင် (၂၄၅) ကျောင်း၊ တွန်းဇံမြို့နယ်တွင် (၁၈၈) ကျောင်း၊ ဟားခါးမြို့နယ်တွင် (၁၇၃) ကျောင်း၊ ကန်ပလက်မြို့နယ်တွင် (၁၅၆) ကျောင်း၊ မင်းတပ်မြို့နယ်တွင် (၁၂၇) ကျောင်းတို့ ဖြစ်ကြသည်။
၎င်းစာစောင်အရ၊ ထန်တလန်မြို့ပေါ်တွင် ဘုရားကျောင်းပေါင်း (၁၇) ခု ရှိပြီး ကျေးရွာများတွင် ဘုရား ကျောင်းပေါင်း (၂၂၈) ခု ရှိသည်။ ထန်တလန်မြို့နယ်တစ်ခုလုံး၏ လူဦးရေစုစုပေါင်းသည် (၅၁၈၅၇) ယောက် ရှိရာ လူဦးရေ (၂၁၁) ဦးလျှင် ဘုရားကျောင်းတစ်ခုနှုန်း ရှိနေသည်ဟု ကိန်းဂဏန်းအရ ညွှန်ပြနေသည်။
ချင်းပြည်နယ်၏စုစုပေါင်းလူဦးရေစာရင်းသည် ၂၀၁၄ ခုနှစ်၏စာရင်းအရ (၄၇၈၈၀၁) ဦး ရှိခဲ့ပြီး ၂၀၁၇ ခုနှစ်၏စာရင်းအရက (၅၀၄၁၁၉) ဦးရေ ရှိလာရာ၊ (၃) နှစ်အတွင်း လူဦးရေ (၂၅၃၁၈) ဦးတိုးလာသည်ကို ညွှန်ပြလေသည်။ တနည်းအားဖြင့် ဆိုရသော် ချင်းပြည်နယ်တွင် လူဦးရေတိုးနှုန်းသည် တစ်နှစ်လျှင် လူဦးရေ (၈၀၀၀) ကျော်တိုးနေသည်ဟု ကောက်ချက်ချရမည်ဖြစ်သည်။
၂၀၁၇ ခုနှစ်၏ချင်းပြည်နယ်လူဦးရေစာရင်းအရ တွက်ချရသော်၊ ချင်းပြည်နယ်တွင် လူဦးရေ (၁၇၅.၃၅) လျှင် ဘုရားကျောင်း တစ်ခု ရှိနေသည်ဟု ဆိုရမည်ဖြစ်သည်။ ၀၀၂ ကုန်ဇမှုန်း
